Morten (25) tok permisjon frå jobben for å satse på diskgolf

– Akkurat no lever eg av dette. Det har eg gjort sidan eg tok permisjon frå jobb i april, seier Morten Brenna.

25-åringen frå Kristiansand jobba som tømrar og har tidlegare drive med fotball og bordtennis. Men no er det diskgolf som gjeld.

I sommar har han reist Europa rundt for å spele turneringar.

– Eg har nok spelt 15 turneringar så langt i år, seier Brenna.

Vanskeleg satsing

Akkurat no er Brenna rangert som den tredje beste nordmannen på verdsrankinga i diskgolf.

Totalt er han rangert på plass 162.

Brenna speler på proffnivå, men påpeikar at det ikkje er eit liv i luksus.

– Det er lite luksus og handlar meir om å leve så ein held ut. Å satse i denne sporten er ikkje for alle.

Han seier det går greitt for han.

– Men eg ser at eg hadde slite med å dekkje eit huslån medan eg satsar.

Sport i vekst

Brenna har med seg rundt 23 diskar i sekken han bruker til konkurransar.

I bilen har han 50 diskar til.

Men sporten treng ikkje vere dyr å komme i gang med, meiner han.

– Skal ein ut å spele med kompisar for gøy, held det å investere for 300 kroner. Ein kan ha det kjempegøy med berre eit par diskar, seier han.

Mange har fått auga opp for sporten dei siste åra.

– Medlemstala har vore i sterk vekst sidan korona. No har vi nesten 8000 aktive medlemmer og meir enn 140 klubbar over heile landet, seier Erik Hammer Staalesen.

Han er diskgolfansvarleg i Noregs Amerikanske Idretters Forbund, som diskgolf ligg under.