– Slik eg kjenner Kristine som spelar med god handballfagleg innsikt, taktisk sterk og med vinnarinstinkt, har eg stor tru på at ho kan utvikle seg til å bli ein utmerkt trenar, seier Breivik til NRK.
Marit Breivik som landslagssjef under VM i Frankrike i 2007. Breivik leia Norge til sølv.
Foto: CHARLES PLATIAU / SCANPIXHo veit betre enn dei fleste kva ho snakkar om.
Marit Breivik vann 13 meisterskapsmedaljar i EM, VM og OL som sjef for handballjentene.
Vurderer trenarkarriere
Laurdag kveld fekk ein av hennar tidlegare elevar debuten som trenar.
Kristine Lunde Borgersen steppa inn som hovudtrenar i Vipers Kristiansand då Gunnar Pettersen vart sjukmeld på ubestemt tid dagen før europacupkampen mot Krim.
Sørlendingane vann kampen 29–27 etter å ha ligge under med seks mål halvvegs i første omgang.
Dermed har dei to mål å gå på før returmøtet i Slovenia om ei veke.
– Dette gjer meirsmak. Det kom litt plutseleg, men det er kanskje den vegen eg vil etter kvart, sa Lunde til NRK etter kampen laurdag.
Kristine Lunde Borgersen jublar for scoring under kampen mot Krim Ljubljana i Kristiansand laurdag.
Foto: Anne Wirsching/NRK– Kjempeviktig erfaring
Som spelar vann 35-åringen både EM-, VM- og OL-gull med landslaget. I tillegg vann ho Meisterligaen med Viborg to gonger.
Under EM i 2008 vart ho også kåra til EMs beste playmaker og mest verdfulle spelar.
– Det er veldig moro om ho finn motivasjon til å satse på trenaryrket. Vi treng trenarar som sjølv har vore aktiv heilt i verdstoppen. Det er kjempeviktig erfaring å ta med seg inn i leiarskapet, seier Breivik.
Uvisst om Pettersen kjem tilbake
Denne sesongen har Lunde Borgersen vore assistenttrenar under Gunnar Pettersen i Vipers Kristiansand.
Det er framleis uvisst om Pettersen kjem tilbake.
Gunnar Pettersen er sjukmeld på ubestemt tid frå jobben som hovudtrenar i Vipers Kristiansand.
Foto: Teigen, Trond Reidar / NTB scanpix– Vi får ta dette som det kjem. Men vi må sette oss ned og prate når vi veit meir, seier dagleg leiar i Vipers Terje Marcussen på spørsmål om Lunde er aktuell som trenar ut sesongen om Pettersen ikkje kjem tilbake.
– Eg er sikker på at Kristine vil klare jobben med glans, seier Marcussen.
– Får sjå kva som skjer
Lunde Borgersen har ikkje konkludert med kva ho vil svare om spørsmålet kjem.
– Det har eg ikkje tenkt så mykje på. Vi får sjå kva som skjer, seier Lunde.
Den tidlegare landslagsprofilen skal uansett halde fram som assistenttrenar i Vipers neste sesong.
Då tek Glassverket-trenar Kenneth Gabrielsen over som hovudtrenar i den hardtsatsande eliteserieklubben.
VIDEO: Sjå intervju med Kristine Lunde Borgersen etter trenardebuten mot Krim.
