– Eg stolte på meg sjølv og gjekk etter magekjensla, og så har eg hamna der eg er i dag, seier Kristiane Svendsen Blesvik (16) frå Gjerstad.
Denne sommaren jobbar ho som «altmuligperson» i Kragerø Naturstein AS.
Har du råd til unge som slit med å finne ut av kva dei vil bli?
– Stol på deg sjølv og vêr modig nok til å følgje interessene dine. Ikkje feig ut viss det til dømes ikkje er så mange andre jenter som gjer det same som deg. Stå i det, seier 16-åringen.
Ho har alltid vore interessert i maskiner, og drøymt om ein jobb i anleggsbransjen sidan ho var liten.
– Eg går i pappas fotspor, fortel 16-åringen.
– Draumejobben
Både faren og onkelen jobbar i selskapet.
– Dei har motivert meg til å jobbe der. Dei synest det er viktig å få jenter inn i anleggsbransjen.
Det var Aust-Agder Blad som først skreiv om sommarjobben til 16-åringen.
– Det er draumejobben min. Eg trivst veldig godt.
Blesvik veit om fleire på hennar eigen alder som slit med å finne ut av kva dei vil, og forstår godt at det kan vere vanskeleg.
– Eg kjenner meg veldig heldig som har funne ut av det såg tidleg. Det er nok veldig tungt når ein ikkje veit kva ein vil bli.
Synes du det er vanskelig å bestemme deg for hva du skal studere?
– Stol på deg sjølv
Då 16-åringen skulle velje kva ho skulle gjere vidare i livet etter ungdomsskulen, valde ho å følgje interessene sine.
I tillegg til å utdanne seg til å bli anleggsgartnar, er ho på fritida avløyser i eit fjøs. Ho har nemleg også drøymt om å bli bonde.
– På den måten har eg fått blanda inn begge ønska mine.
Kvifor trur du det er så vanskeleg å velje?
– Mange synest det er vanskeleg å velje kva ein skal vidare i livet, når ein er så ung. Dei vippar mellom fleire moglegheiter, og då låser det seg litt. Mange er redde for å angre.
Mange synest det er vanskeleg å velje
Dei siste åra har rapportar vist at meir enn halvparten av dei unge synest det er vanskeleg å ta eit yrkesval.
– Ein del har nok inntrykk av at «alle andre» veit kva dei vil, men sånn er det slett ikkje, seier karriererettleiar Marit Overrein i karriereveiledning.no.