Kan likevel bli i ØIF Arendal

– Eg har sagt at dersom det er interesse for å sjå på løysingar, så er eg budd på å sjå på det, seier Kurtovic til NRK.

Onsdag kveld sende eliteserieklubben ut pressemelding om at Kurtovic gir seg etter denne sesongen.

Pendlar frå Sandefjord

Trenaren peika mellom anna på stor belasting i samband med pendling mellom heimbyen Sandefjord og Arendal.

I tillegg krevde klubben eit svar frå Kurtovic innan 31. desember på om han blir med vidare.

– Eg var nøydd til å gje klubben eit svar. Eg har tenkt mykje på korleis eg skal klare eitt år til med pendling. Eg konkluderte med at eg ikkje vil klare å vere motivert og fokusert på oppgåva som trenar i Arendal. Det gjorde at eg konkluderte som eg gjorde, seier han.

Håpar på dialog

Sportsleg leiar Per Carsten Michelsen vedgår at han ikkje har gitt opp med tanke på å behalde Kurtovic som trenar.

– Eg håpar vi kan komme i ein dialog igjen. Samstundes må vi sjå oss om etter ein ny trenar. For realiteten er at han har sagt opp og vil slutte etter sesongen. Men eg vil aldri seie aldri og vil aldri gje opp, seier Michelsen.

Kurtovic er open for dialog med klubben.

– Eg har sagt til Per Carsten Michelsen at døra alltid står opa. Fins det ei løysing, så er eg budd på å høyre på det. Men heilheita per dags dato gjer meg til ein dårlegare trenar, seier Kurtovic.

Kryssar fingrane

ØIF-kaptein Eirik Heia Pedersen håpar at klubben og Kurtovic finn ei løysing slik at han blir verande også neste sesong.

– Eg håpar det. Når det er ei moglegheit må kanskje klubben strekke seg litt til for at det går i boks. Det håpar eg verkeleg, seier han.

Også nestleiar i supportarklubben Svermen, Kari Sunde, kryssar fingrane for at Kurtovic skriv under på ei ny kontrakt.

– Så lenge det er håp går eg ikkje ned i kjellaren av den grunn. Vi får vente og sjå. Kanskje det er noko som skjer mot våren som gjer at han likevel vel å halde fram, seier Sunde.