Jerv-trenar: – Vi gler oss veldig

– Vi har budd oss som vi alltid gjer til kampar. Vi må sørge for å vere klar når kampen vert blåse i gang, seier trenar Steinar Pedersen til NRK.

Grimstad-klubben har imponert dei aller fleste denne sesongen. Laget rykte opp frå 3. divisjon førre sesong, men toppar si avdeling i 2. divisjon med berre tre serierundar att.

Jerv har faktisk ikkje tapt ein seriekamp sidan 2. august då Ørn-Horten vann 4–3 i Grimstad. Jerv leiar serien tre poeng føre rivalen Vindbjart.

Dersom Jerv slår Fram Larvik, og Vindbjart spelar uavgjort borte mot Notodden, vil Jerv leie serien med fem poeng før dei to siste serierundane.

* Kun vinnaren av avdelinga rykker opp til 1. divisjon

Imponert over spelargruppa

– Humøret og stemninga er veldig god i spelargruppa. Det er ein god optimisme og positivitet, og vi gler oss veldig til kampen mot Fram Larvik, seier den ferske trenaren.

Pedersen har sjølv vore med på viktige kampar i spelarkarrieren si. Han har rykt opp og ned med Start. I tillegg har han Meisterliga-kampar med tyske Borussia Dortmund på CV-en.

Han veit med andre ord godt kva det inneber å spele avgjerande kampar.

– Det er klart det er viktig å ha vore i slike settingar tidlegare. Men vi har ei sterk spelargruppe som stadig imponerer meg, seier trenaren.

Jerv har spelt åtte strake kampar utan å tape. Sist knuste dei Birkebeineren heile 9–0 på heimebane.

• Les også: – En sørlandsfight om opprykket er ikke meg imot

Gratis supportarbuss

Laurdagens motstandar frå Larvik har framleis teoretiske moglegheiter til å rykke opp til 1. divisjon.

– Fram Larvik har kjempa i toppen heile sesongen. Vi møter eit godt lag som er bra på heimebane. Det er vi fullstendig klar over. Eg har sett dei fleire gonger og veit kva som møter oss, seier han.

Klubben har sett opp gratis supportarbuss til bortekampen i Vestfold.

– Det er ei fantastisk greie. Vi rundt laget set utruleg pris på dugnadsgjengen og sponsorane i klubben som bidreg til å gjere det mogleg, seier Pedersen.

Ifølgje Espen Skalleberg, som organiserer turen til Larvik, er kring 50 supporterar påmelde.

– Vi opplever stor interesse. Dersom det kjem fleire som vil vere med vil vi køyre privatbilar i tillegg til buss, seier Skalleberg.

Neste sesong kan Fram Larvik, Birkebeineren og Arendal bli bytt ut med Brann, Sandnes Ulf og Fredrikstad.