Førre sesong scora bakspelaren frå Danmark heile 145 mål i løpet av eliteseriesesongen.
Det gir eit snitt på nesten sju mål per kamp.
- Les også: Vipers vil hente Løke
Fekk mental hjelp
Nærast på toppscorarlista var tidlegare Vipers-spelar Veronica Kristiansen. Glassverket-spelaren scora 140 mål.
– Eg jobba veldig mykje med det mentale, og bli meir direkte mot mål. Det gav resultat og mange mål. Det kom litt brått på meg, smiler Jensen.
I fjor var Jensen ein av laget sine viktigaste spelarar. Ho fekk drøssevis med speletid.
– I år blir det nok ikkje 60 minutt kvar kamp, men eg skal prøve å utvikle spelet mitt like mykje som i fjor. Så skal eg halde fram med å vere direkte mot mål, seier den tidlegare Slagelse-spelaren.
Vipers har nemleg henta inn fleire spelarar i 23-åringen sin posisjon. Trenar Gunnar Pettersen varslar at det vil bli rullering.
– Det blir ein ny situasjon for Annette. Det er ein heilt annan konkurranse, spesielt på bakspelarplass. Vi har sju spelarar som alle ventar speletid. Det gjeld å ta vare på sjansen du får til ei kvar tid, seier Pettersen.
- Les også: – Nervøsiteten blir verre og verre
God frå 7-meteren
Trenaren dreg mellom anna fram sjumeterkast som ein styrkane til dansken. I fjor scora ho heile 47 mål frå sjumetersmerket. Det var desidert flest i eliteserien.
– Så er ho ein spelar som lagar mykje mål utan at ein eigentleg legg merke til det, seier Pettersen.
Søndag opnar Vipers Kristiansand sesongen med bortekamp mot Byåsen i Trondheim. Annette Jensen ser fram til endeleg å komme i gang.
– Eg gler meg skikkeleg. Eg trur det vert veldig gøy med det laget vi har i år. Vi har ein breiare stall enn i fjor. Vi ser ikkje så stor skilnad når vi gjer byter. I tillegg er Gunnar flink til å finne fram dei gode kvalitetane til kvar enkelt spelar, seier Jensen.
