Hard kamp om plassane ved nytt studium ved UiA

– Desse tala er dei mest positive, seier utdanningsdirektør ved Universitetet i Agder (UiA) Greta Hilding.

Ho viser til dei 328 søkjarane som kjempar om 40 planlagde plassar ved det nye masterstudiet i rettsvitskap, som startar til hausten.

Bachelorgrada i rettsvitskap også har fått eit solid oppsving.

– Vi trur nok at det har samanheng med at vi no kan tilby både masterstudium og bachelorstudium. Det gjer at studentane kan ta alle fem åra ved UiA, seier Hilding.

Færre vil ta lærarutdanning

Tala for lærarutdanningane ved UiA er ikkje like oppmuntrande.

Som elles i landet, er det nedgang.

– Dette er den største bekymringa i årets søkjartal. Og når vi har forhøyrt oss litt rundt, verkar det som om det også er ein trend internasjonalt, seier Hilding.

Ho påpeikar at søkjartala alltid varierer litt frå år til år, men seier at det no er ein veldig tydeleg trend på at søkjartala går ned:

• Barnehagelærar i Grimstad og Kristiansand er ned høvesvis 44 % og 21 %

• Grunnskulelærar for 5. til 10. trinn er ned 47 %

• Lektorutdanninga for 8. til 13. trinn er ned 12 %

Når det gjeld søkjartala til UiA sett under eitt, seier Hilding at det er veldig små endringar frå år til år.

– Vi ligg sånn cirka an som vi har gjort tidlegare.