– Det har ikkje vore ei enkel avgjerd. Eg er svært takksam for å ha fått lov til å leie klubben dette året.
Det seier Løyland i pressemeldinga som klubben sende ut tysdag.
Ho har sagt til klubben at ho ynskjer å gi seg som dagleg leiar etter sesongslutt 31. mai 2024.
Økonomiske problem
Handballklubben frå Kristiansand har hatt store økonomiske problem det siste året og var nær ved å gå konkurs. Løyland seier det både har vore både oppturar og utfordringar.
– Året har gitt store oppturar, Champions League gull i Budapest, NM gull og nå gode sjansar for nytt seriegull. Det har også vore store utfordringar med økonomi, men nå er vi heldigvis over den verste kneika takka vere ei enorm innsats frå fleire.
Ho meiner Vipers no har alle høve til å bygge eit enda sterkare merkenamn, både på og utanfor banen.
– Det er ikkje sikkert denne avgjerda er lett å forstå for alle som sit utanfor, men eg kjenner meg sjølv godt, og eg har respekt for den innsatsen jobben krev. Og da veit eg også når tida er inne for å gi seg, og dét er det etter denne sesongen er over, seier Løyland.
– Beklageleg
Styreleiar Rune Nomeland seier følgande om situasjonen:
– For klubben er det sjølvsagt beklageleg å miste den daglege leiaren vår etter berre eitt år, men vi har respekt og forståing for avgjerda. Dette har vore eit svært krevjande år. Eg er veldig fornøgd med at klubben nå er i ein sterkare posisjon enn nokon gong tidlegare.
Styret vil no sette i gang ein prosess for å finne ny dagleg leiar, står det i pressemeldinga.
– Eit tap for Vipers
NRK sin handballekspert Peder Langfeldt seier Løyland har gjort ein fantastisk jobb for toppklubben.
Han trur det blir krevjande å finne ny dagleg leiar i klubben.
– Det er ikkje for alle å vere leier for ein så stor handballklubb. Forhåpentlegvis er det også så attraktivt at nokon vel dette, men det er ein altoppslukande jobb, seier Langfeldt.