– No har vi lagt siste hand på verket på det som er Norges finaste terrengsykkeløype, seier leiar i Arendal Singletrack Jan Fasting til NRK.
Jorda som vart frakta ut med helikopter skal dekkje skarpe steinar og røter for å gjere forholda optimale for terrengsyklistane.
– Gøy å byggje
– Jorda skal sørge for at stiane blir heilt perfekt å bruke, seier han.
Det er ein kameratgjeng med sykkel som lidenskap som tok initiativ til å byggje sykkelcrossløypa i Arendal. Løypa er på åtte kilometer.
– Førebels er det fleire brukarar til fots enn på hjul. Vi håpar at dette skal snu når barn og unge fattar interesse og ser moglegheita dei har rett i nærleiken, seier Fasting.
– Vi er ein kompisgjeng som tykkjer det er like gøy å byggje løyper som å sykle, seier leiaren.
NETT-TV: Håper mange syklister vil ta turen i terrenget med sykkelen.
1,1 million kroner
Eldsjelene fekk støtte frå Gjensidigestiftelsen for å byggje løypa. Den har kosta til saman 1,1 million kroner.
– No blir løypa mykje mjukare og betre å sykle på enn før, seier Fasting.
Steinar Ytrehus som er ein av dei som har vore med på å byggje løypa seier at dei har kosa seg med arbeidet.
– Det er veldig morosamt. Vi er ute så mykje vi kan i skogen, byggjer mykje og syklar mykje. Det er nesten like morosamt å byggje. Vi finn linjer og flyt i terrenget. Så er det sosialt med mange gode kameratar, seier han.
