– Eg er berre så utruleg rørt.
Det seier musikklærar Brit Ribe Fjelde etter ei oppleving utanom det vanlege.
Elevane hennar på 7. trinn på Vågsbygd skole i Kristiansand, ville gjere noko fint for den engasjerte musikklæraren før dei sjølv skulle slutte på skulen.
Ville oppfylle draum
Elevane visste at den store draumen til læraren var å høyre songen som ho har skrive saman med mannen sin, og som har vorte brukt i skulesamanheng, bli spelt av eit symfoniorkester.
Elev Nora Skjelbred Pettersen tok saka i eigne hender og tok kontakt med orkesterdirektøren i Kristiansand symfoniorkester.
– Då Brit sa at dette var hennar største draum og eg tenkte på alt det bra ho har gjort for oss, så berre gjorde eg det, seier Nora.
Uvanleg førespurnad
Orkesterdirektør Pål Svendsberget vart rørt av førespurnaden frå eleven, og tilfeldigheitene skulle ha det til at orkesteret hadde litt ledig tid i samband med ei anna innspeling.
– Eg tenkte at her må vi hive oss rundt, seier han.
Komponist Stig Nordhagen laga eit arrangement på rekordtid og orkesteret øvde inn ei framføring.
Eit par veker etter bli lærar Brit og elevane hennar invitert til Kilden teater- og konserthus i Kristiansand.
– Det er stort
Så byrjar symfoniorkesteret å spele.
Brit høyrer fort at det er skulesongen «Hold ut – stå sammen», som ho har skrive sjølv.
Då sprett tårene.
– Det er så stort for meg at eg trur ikkje folk fattar det! Eg blir så rørt av å få lov å oppleve desse fantastiske musikarane. Så ser eg på ansikta til elevane at dei koser seg. Ja, det er stort!
Lærar Brit har gjort inntrykk på elevane i den tida dei har gått på skulen.
– Ho prøver alltid å få elevane sine til å ha det bra. Ho bryr seg skikkeleg, seier Nora Skjelbred Pettersen.