Hopp til innhold

Bombegruppa i Arendal: Har funne sprengstoff

Bombegruppa er på plass på Tromøy i Arendal etter det vart funne sprengstoff i eit hus.

Bombegruppa i Arendal

Politiet evakuerer no dei næraste naboane.

Foto: Espen Bierud / NRK

Rundt klokka 12 starta arbeidet med å evakuere folk i dei fire næraste husa.

Politiet stadfestar at det er gjort funn av «ikkje ubetydelege mengder sprengstoff». Truleg dreier det seg om dynamitt.

Politiet opplyser til NRK at dei reknar med å få fjerna dette i løpet av ettermiddagen. Det betyr at dei som er evakuerte truleg kan flytte heim i løpet av ettermiddagen eller kvelden.

Bakgrunnen for det heile er at ein bil med fire personar vart stoppa i arendalsområdet natt til onsdag.

Føraren var mistenkt for ruskøyring og det vart funne eit våpen i bilen.

Ingen av dei fire, ei kvinne og tre menn, ville vedkjenne seg våpenet. Det førte til at fleire hus vart ransaka.

Fleire av personane er kjent for politiet frå før. Alle dei fire er framleis pågripne.

Politiet vil ikkje gå ut med meir informasjon om dei arresterte.

– Det er for tidleg å sei om dei vil bli framstilt for varetektsfengsling, seier Helge Torsvik ved Arendal politistasjon.

Han kjenner ikkje til om PST er orientert om saka.

Bombegruppa i Arendal
Foto: Espen Bierud / NRK

Siste nytt fra NRK Sørlandet