– Av bygningsbrannar i fyringsperioden veit vi at 30 prosent er relatert til brann som har starta i pipeløpet. Desse brannane kan spreie seg, seier Hans Arne Madsen ved brannstasjonen i Kristiansand til NRK.no.
På landsbasis rykkjer brannvesenet i snitt ut til 3000 pipebrannar i løpet av vinteren. Men mørketala er store.
Brannvesenet reknar med at opp mot 30 000 kan bli utsett for pipebrann i løpet av vinteren.
Fyr med tørr ved
– Mange av pipebrannane blir aldri varsla fordi huseigar ikkje sjølv er klar over at det har vore ein brann, seier han.
Med ein kuldeperiode fleire stader i landet åtvarar brannvesenet huseigarar mot pipebrann. Det er fleire ting ein kan gjere for å førebyggje ein pipebrann.
– Det er viktig å fyre med tørr og god ved, slik at du unngår sotavleiring i pipa. Det er dette som tek fyr når det får lov til å setje seg i pipeløpet, seier Madsen.
– Det er òg viktig å ha god avstand frå pipeløpet til brennbart materiale. Så gjeld det å følgje med gjennom heile vinteren, seier han.
Madsen påpeikar også at mange faktisk har for stor omn heime i stova, som varmar meir enn naudsynt.
– Dropp lause omnar
– Då skrur dei gjerne ned trekken i håp om at det skal bli mindre varme frå ovnen. Det er ikkje lurt, seier han.
I tillegg til vedfyring ber han folk vere på vakt når det gjeld elektrisk fyring.
– Det er lurt å bruke omnar som er fastmonterte med god avstand til gardiner og andre brennbare gjenstandar, seier han.
– Lause omnar må gjerne brukast, men som ei sekundær oppvarmingskjelde når du er i rommet. Vi veit at dei er meir utsett for slag, flytting og husdyr, som kan velte dei. Difor er det viktig å vere til stades, seier Madsen.