Må betale 17 kroner for å passere bommen i rushtida

I dag er prisen 11 kroner med full rabatt. Rushtidsavgifta skal gjelde frå 6.30 til 9.00 om morgonen, og frå klokka 14.30 til 17.00 om ettermiddagen.

Prisen utanom rushtida vil liggje omtrent på dagens nivå.

– 17 kroner er litt opp i forhold til dagens takst med full rabatt. Men når ein tek hensyn til at dei same folka truleg køyrer utanom desse rusheperiodane og får ein lågare takst, så trur eg den totalen kan vere levleg, seier fylkesordførar Terje Damman til NRK.no.

Ikkje billegare buss

Utrekningar viser at rushtrafikken vil synke med 6 prosent når avgifta vert innført neste sommar.

• LES: – Vanskelig å unngå rushtidavgift

– Dette er ein naudsynt ting vi må gjere for å få tilgang til dei midlane vi treng for å løyse kollektiv- og framkommelegheitsproblemet totalt i kristiansandregionen, seier Damman.

Men trass i innføring av rushtidsavgift vil det truleg ikkje bli fleire bussruter i Kristiansand og prisane vil heller ikkje gå ned.

– Slik det ser ut per i dag vil eg anta at det er dagens rutestruktur som ver vidareført, men at den må ta høgde for kapasitetsutviding når avgifta vert innført, seier fylkesordføraren.

– Vil prisane gå ned?

– Eg antar at det ikkje vil skje. Eg rekna med at prisnivået vert oppretthalde, seier han.

– Stor utfordring

Fleire ventar at det vil bli ei massiv opprusting av kollektivtransporten når rushtidsavgifta kjem.

– Det viktigaste no er å ha kapasitet på rutene for å ta unna den venta veksten som vil komme, seier Damman

– Dersom forventningane tilseier at det vil komme nye ruter som ikkje har bussamband i dag, eller som har svakt bussamband, trur eg ikkje ein kan rekne med at det vil slå til. I alle fall ikkje i første runde. Det er ei stor utfordring berre å klare å halde oppe dagens tilbod på eit forsvarleg nivå, seier han.

– Er litt i tvil i dag

Ordførar i Vennesla Torhild Bransdal (KrF) meiner det ikkje er godt nok å berre halde opp dagens nivå på kollektivtransport etter innføring av rushtidsavgift.

– Det er heilt essensielt for det vi skal gjennomføre med opptrapping av bompengar. Forutsetningane var eit betre og styrka kollektivtilbod. Det er noko vi må stå på og jobbe for heile tida, seier Bransdal til NRK.no.

– Kan folk stole på at det blir eit betre tilbod?

– Vi har jo gått veldig høgt på bana og sagt at det skal det bli. Eg er litt tvil i dag, seier Bransdal.

Rushtidskamp

Dei borgarlege partia i Kristiansand kjempa lenge imot innføring av rushtidsavgift. Men i april i år innsåg ordførar Arvid Grundekjøn (H) at det gjekk mot innføring av avgifta, men måtte gi opp for å få statlege pengar.

Bakgrunnen for det var at staten gav klar beskjed om at dei ville halde tilbake 60 millionar kroner i belønningsmidlar til kollektivtransport, dersom Kristiansand ikkje klarar å redusere biltrafikken.