NRK Meny
Normal

Woodoo på Hafstadfjellet

– Det er mystisk her oppe, seier artistane frå Haiti. Over hundre friskusar såg ein spesiell konsert i surt vêr på Hafstadfjellet.

Haitiske Chouk Bwa Libète spelte fjellkonsert under Førdefestivalen

SJÅ VIDEO: Chouk Bwa Libète frå Haiti kosa seg i tåka på Hafstadfjellet og leverte ein energisk konsert for over hundre frammøtte på toppen.

– Det er sprøtt for oss å vere her, på toppen av Noreg, seier artisten Sambaton.

Saman med dei andre artistane i Chouk Bwa Libète, frå det karibiske landet Haiti, heldt Sambaton Førdefestivalen sin årlege fjellkonsert i tåka på Hafstadfjellet over Førde.

Innimellom tåkeskyene kunne musikarane og publikum sjå glimt av utsikt til Førde og fjorden, akkompagnert av energiske woodoo-rytmar frå Karibia.

– Vi har ei kjensle av at det er veldig mystisk her oppe. Mystikken passar bra til musikken vår, seier Sambaton.

Chouk Bwa Libète, Førdefestivalen

FOLKSOMT: Godt over hundre møtte opp på toppen for å få med seg konserten.

Foto: Mattias Rolighed Bergset / NRK

Dansefot

Sjølv om det regna mykje både før og etter konserten var det ingen regn då Chouk Bwa Libète framførte musikken sin. Musikken består av song og rytmar – og dansefot.

Dei frammøtte friskusane i publikum var glade for litt opphald, og etter kvart såg det ut til at det òg rykka litt i dansefoten til deler av det regnjakkekledde publikummet.

Sambaton seier at dei òg hadde det moro.

– Dette var ein fin konsert. Det er bra å få spele for eit publikum som ikkje kjenner oss. Vi er glade for å få utveksle musikk med Noreg.

Gruppa frå Haiti er no på ein 90 dagar lang turné i Europa, men opna turneen på Hafstadfjellet.

– Woodoo er kjærleik og samhald

Chouk Bwa Libète, Førdefestivalen

MIRAKEL: For Chouk Bwa Libète kjem musikken naturleg, som eit mirakel, seier dei.

Foto: Mattias Rolighed Bergset / NRK

– Musikken vår er tett knytt til Haiti og til tradisjonane våre. Så det er ikkje noko vi har lært på skulen, det er berre noko som er i oss, som eit mirakel. Vi bruker berre trommer som instrument og så syng vi. Det er naturleg, seier Sambaton.

Han forklarer at woodoo-kulturen er sterk i Haiti og musikk er ein viktig del av denne kulturen.

– Det er vanskeleg for oss å forstå kvifor woodoo er forbunde med hekseri og djevelen her i Europa. For oss handlar woodoo om kjærleik og samhald, og om å ta vare på kvarandre. I eit fattig land som Haiti er dette noko som samlar oss, seier musikaren.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.