Kommunen er svært skuffa over at bankane som eigde Terra Securities, ikkje har støtta dei meir etter konkursen i dotterselskapet.
Burde ha dekka tap
Vik kommune kjem til å tape over 90 millionar kroner på Terra-skandalen. Litt av skulda legg ordførar Marta Finden Halset på sparebankane som eigde Terra Securities. No varslar ordføraren at dei for første gong vil leggje banktenesten sine ut på anbod.
- Det er 72 sparebankar som eig Terra-systemet som har tent veldig mykje på dette, seier ho og meiner dei burde dekka delar av tapet.
Skjønar ikkje kritikk
Kritikken fell også på kommunen sin eigen bank, Vik sparebank, som også er ein del av Terragruppa. Dei har vore kommunen sin følgesvenn i generasjonar, og aldri har dei hatt konkurranse om tenestene. Styreleiar i sparebanken, Knut Hovland, skjønar ikkje kritikken.
- Vi er med heile tida og støttar opp om næringslivet i kommunen og spelar ei veldig viktig rolle der. Vi ser ikkje at vi skal ta på oss noko skuld for det som har skjedd her.
- Det står i lova
Finden Halset seier dei har hatt eit godt forhold til Vik sparebank, og at anbodskonkurransen ikkje er noko takk for sist.
- Kontrollutvalet har stilt spørsmål ved om når banktenestene skal ut på anbod. Vi skal sjølvsagt halde oss til det regelverk som styrer også desse tenestene, seier ho.
- Vi vil klare oss
Vik kommune er sparebanken sin største kunde. Hovland seier at dei vil overleve sjølv om kommunen ikkje er med vidare.
- Kommunen er ein av dei store kundane våre og vil strekke oss langt for å behalde dei, seier Hovland.
- Kommunen seier at dei skal gjere dette fordi det står i lovverket at banktenestene skal ut på anbod. Samstundes har dei ikkje hatt tenestene ute på anbod før. Kvifor trur det kjem no?
- Ja, du tenker kanskje på Terra-saka. Kommunen er i ein vanskeleg situasjon og dei gjer det dei kan for å få kostnadane ned. Vi skal gjere det vi kan for å behalde dei som kundar, seier Hovland.