Nordfjord Kjøtt bestilte rapporten frå Veritas etter medieoppslaga om bedrifta hausten 2014. NRK Sogn og Fjordane hadde då fleire saker om tilsette som hadde kome til skade.
- Les også:
- Les også:
No har avisa Fjordingen fått tilgang til rapporten. NRK var tidlegare i veka i kontakt med Nordfjord Kjøtt for å få ut rapporten, men vart då avvist av dagleg leiar Geir Egil Roksvåg.
Ifylgje Fjordingen konkluderer Veritas med at Nordfjord Kjøtt har eit godt system for opplæring, og at det er investert i nytt, moderne produksjonsutstyr med tilhøyrande verneinnretningar.
Veritas rosar og verksemda for at det er tilsett eigen fysioterapeut og at dei tilsette har tilgang til treningsrom.
«Betre opplæring av nytilsette»
På den andre sida meiner Veritas at opplæringa i helse, miljø og tryggleik (HMS) for nytilsette bør bli betre. I tillegg bør det bli betre rutinar for handtering av avvik, det må etablerast vedlikehaldsplanar for anlegg og arbeidsutstyr, og det må vere kontinuerleg arbeid for god HMS-kultur.
NRK har prøvd å kome i kontakt med dagleg leiar Geir Egil Roksvåg i Nordfjord Kjøtt for å få hans kommentar til rapporten, men han har ikkje vore tilgjengeleg.
Både samd og usamd
Til avisa Fjordingen seier Roksvåg at Nordfjord Kjøtt er samd i mykje i Veritas-rapporten, men usamd i andre delar.
– Vi har utfordra Veritas på ein del punkt vi meiner dei må ha misforstått eller ikkje fått med seg. Så er det slik at det er forbetringspunkt i alle bedrifter.
- Les også:
- Les også: