For dei høge temperaturane dei siste dagane, kombinert med regn tidleg i veka, har ført til overløp på to av kraftmagasina til Hydro Energi, fortel Anneli Nesteng. Ho er sjef for Hydro Energi Sogn.
– No er det blitt litt rolegare, men måndag kveld hadde vi 163 kubikkmeter i sekundet i Fortun. Då såg eg sjølv at det var vatn på ein veg inst i Fortunsdalen, og på Vassbakken camping var det svært mykje vatn.
Difor har Hydro Energi fokus på flaumdempande tiltak.
– Vi prøver å disponer vatnet slik at dei går i dei rette elveløpa, og at mest mogeleg av det blir nytta til kraft.
- LES OGSÅ:
God plass i Tyin og Storevatnet
Men dei største vassmagasina til Hydro Energi, Storevatnet på Sognefjellet og Tyin på Årdalssida, er langt frå fulle enno.
– Desse to vatna har god demping, som vi seier på kraftspråket. Det vil seie at det er stor reguleringshøgde før vi når den høgaste vasstanden vi har lov å ha.
På Tyin er det 3,5 meter att før det går til overløp, på Storevatnet er det 12,5 meter att.
– Så her er det plass til å ta imot ganske mykje snøsmelting og regn. I Tyin stig det no med 17 cm i døgnet, så det går fort no når temperaturane er så høge, både om dagen og natta.