Ho har kunne vore pensjonist i 12 år, men vil helst jobbe. Difor kan kaffitørste gjester gle seg over eit tilbod midt i Førde sentrum.
– Eg likar menneske og utfordringar. Det er veldig hektisk, men det gjer at det er gøy. Kundane mine gir meg overskot, for her er mykje positivitet, fortel ho.
Kjedeleg å berre strikke og lese
Kafeen ligg i andre etasje på Domus, eller Coop Mega som det heiter no. Det er Ruth som eig og driv den. Her ligg sveler på ei takke på kjøkkenbenken bak disken. På kokeplatene står det steikepanner klare. Ruth står i blårutete forklede og kokkehatt framfor komfyren mens ho laga klart til middagen.
– Det gjeld å ha alt klart. Eg startar klokka ni om morgonen. Eg lagar nesten alt sjølv. Det er god gammaldags mat her, seier ho.
Arbeidsdagen varer frå halv ni når ho reiser heimanfrå til ho og mannen er heime i femtida. Å ha det travelt, likar ho betre enn å vere pensjonist.
– Det blei så kjedeleg å sitje med eit handarbeid eller å lese. Det gav meg ingenting. No prioriterer eg dette. Eg ser alle dei takksame gjestane som er her, dei er jo så blide. Dette er meiningsfylt og gir meg energi.
- LES OGSÅ:
Mannen er viktig medhjelpar
Men ho gjer ikkje alt dette åleine, mannen Per Magnus Baarøy susar rundt mellom kjøkenet og kafédisken i forklede sitt. Han hjelper til på kjøkkenet, handlar og fører papirarbeidet. Kafé Ro har nemleg blitt så populær at han òg har måtte bli med på drifta.
– Eg er også pensjonist og jobbar her heile dagen. Eg veit ikkje heilt kva det vil seie å vere pensjonist. Vi trivast med å jobbe, seier ham.
Om det ikkje er så mykje inntening på kafeen, meiner han dei stettar eit behov for dei som til dømes ikkje kan reise så langt.
– Det er sentrumsnært og eg føler vi gjer ei god gjerning. Eg blir ikkje rik av dette, men det har eg heller aldri vore, ler han medan han steikjer servelatpølse og lauk til middagsgjestene.
- LES OGSÅ:
- LES OGSÅ:
Gjestane trivast
Gjestene tek seg god tid. Pensjonistane Magnhild Rørvik og Oddfinn Hårklau sit med kvar sin kaffikopp.
– I dag skulle eg til Førde for eit tannlegebesøk. Då passa det fint å gå på kafeen etterpå, seier Rørvik.
Hårklau tykkjer det er flott at det finst eit nytt tilbod her som gamle og populære Domuskafeen heldt til i alle år. Her kan dei kose seg med god mat og treffe kjentfolk.
– Og som det står på skiltet, det er flott å kunne roe ned. Her kan vi slappe av, seier han.