– Det er ingen av dei som går i vår klasse som har lyst til å flytte til Førde, sa Sara Lysgård kort tid før politikarane skulle ta avgjerda si.
Å flytte til Førde og byrje på andreåret der ville nemleg vore alternativet for medieelevar på Sogndal Vidaregåande dersom politikarane hadde gått inn for å gjere slik administrasjonen ville: å ikkje opprette noko klasse for andreåret på media og kommunikasjon i Sogndal til hausten.
Det gjekk ikkje politikarane med på, dei gjekk samrøystes inn for å likevel opprette ein andreklasse i Sogndal.
– Eg er veldig letta og glad, og eg trur alle dei andre i klassen kjem til å vere det same når dei får høyre resultatet, seier Lysgård.
– Eit viktig fagmiljø
Fleire av politikarane i opplæringsutvalet skrytte av medielinja i Sogndal under møtet, og streka under kor viktig det er at ein ikkje gir slepp på ho.
– Det er den einaste kreative linja vi har i Sogndal, og dei har eit veldig positivt samarbeid med det lokale næringslivet og med ulike mediebedrifter. Det er eit fagmiljø i positiv utvikling, sa Senea Sabanovic frå Arbeidarpartiet under møtet.
Sikra linje som står sterkt i næringslivet
Det var Arbeidarpartiet, Senterpartiet og KrF som foreslo å likevel oppretta ein medieklasse i Sogndal, og dei fekk med seg alle dei andre partia. Det var også dei tre partia som stod bak endringsforslaget om å halde fram ei klasse i data og elektronikk på Eid.
– Elektronæringa i Nordfjord er ei næring i vekst, og med veldig lyse framtidsutsikter. Det vil sende eit feil signal om vi no kuttar i det skulefaget som dei rekrutterer lærlingar frå, sa Eid-Ordførar Alfred Bjørlo.
Og Bjørlo fekk også viljen sin. Sjølv om berre sju elevar har søkt seg til linja på Eid vidaregåande, var fylkespolitikarane samde med Bjørlo i at det var viktig å halde fram med tilbodet.
Braut med retningslinjene
I utgangspunktet er det slik at ei yrkesfaglinje må ha 8 søkjarar for å bli oppretta, medan 20 stykk lyt søkje på eit studiespesialiserande fag for at ein skal opprette ein klasse.
Både media og kommunikasjon i Sogndal, og data og elektronikk på Eid hadde færre søkjarar enn dette. Fylkespolitikarane hadde likevel eit handlingsrom ved at dei hadde midlar tilgjengeleg til å opprette to klassar utover desse retningslinjene.
Ole Martini er leiar i fylkestinget for ungdom, og hadde teke turen frå Eid for å vere med på møtet i opplæringsutvalet i dag. Han var glad for at politikarane nytta handlingsrommet sitt.
– Vi hadde eit mål om å få skjerma Eid vidaregåande for kutt, og det har vi stort sett klart. Særleg viktig er det at data og elektronikk får halde fram som eiga line, seier Martini.