Den sterke kaupingen jobba og sleit gjennom heile kampen, og fekk betalt i form av tre mål.
Då gjer det lite at beina er tunge som bly dagen deretter.
– Det var ein tøff kamp med mykje springing. Eg merka at eg ikkje har spelt så mykje i det siste. Eg kjenner det godt i beina, for å seie det slik, seier Kristian Fardal Opseth.
Budd på benken
25-åringen hadde ikkje starta sidan Levanger i femte serierunde, men fekk sin sjette kamp frå start grunna Ulrik Flo's skade.
- Slik var det å stå blant Saftkokaradn:
– Ulrik sleit med eit lår, og vi valde å kvile han. Eit godt val, sjølv om kanskje også Ulrik kunne ha scora eitt par mål, kommenterte trenar Eirik Bakke etter kampslutt.
- Les også:
Sjølv om Sogn Avis premierte Fardal Opseth med ein tiar på spelarbørsen, er tremålshelten klar over at han ikkje har noko klippekort til spissplassen.
– Vi har tre gode spissar, samt Ulrik, som kan brukast fleire stadar på bana. Eg må nok bruke meir tid på benken, vedgår han.
– Må nullstille oss
Måndag var restitusjon for slitne Sogndal-bein. Allereie onsdag kjem Jerv til bygda og neste seriekamp.
Då betyr det lite at Sogndal knuste Brann, at dei leiar serien med 11 poeng og har sju strake sigrar.
– Etter ein slik kamp er det viktig å nullstille seg. Det vi gjorde søndag var fantastisk, men det betyr ingenting på onsdag om vi ikkje gir full gass, legg ned arbeidsinnsats, duellar og trykk i spelet vårt, åtvarar trenar Bakke.
Nærare nedrykk enn Sogndal
Årets 1. divisjon er jamn, om ein ser vekk frå Sogndal. Med unntak av serieleiaren ser alle ut til å slå alle.
- Les også:
Faktisk er tabelltoar Sandnes Ulf nærare nedrykksplass, enn dei er å vippe Sogndal ned frå tabelltoppen.
– Målet er å rykkje opp, og å vinne mest mogleg kampar. Men, vi har spelt 13 kampar og det er 17 kampar att. Taper vi ti kampar, så er det plutseleg jamt att. Vi må halde fram å vinne kampar, legg Bakke til.
Har meir å gå på
Sogndal-ekspert Jon Navarsete trur Bakke sine disiplar vil halde fram kursen mot Eliteserien. Han lét seg imponere av maktdemonstrasjonen på Brann Stadion.
– Det er sjeldan eg har sett eit så proft opplegg rundt treningane som no i vinter. I tillegg er Helge Haugen komen inn, og har gitt eit utruleg viktig bidrag i den fysiske styrken, seier den tidlegare Sogndal-profilen og legg til:
– Det er no du skal vise kvaliteten og profesjonaliteten som er der, men eg trur ikkje at vi har sett det beste av dette laget endå. I alle fall ikkje offensivt. Eg veit Bakke framleis har mykje som han vil gjennomføre, seier han.