I fleire dagar har det vore målt temperaturar ned mot 20 minus fleire stader i Sogn og Fjordane. Kjell Ove Hornnes i Førde Bilberging har hatt det travelt dei siste dagane, for mange har opplevde flate bilbatteri.
– Det har vore sterkt pågang i morgontimane. Folk som skal på jobb får ikkje start på bilen. Det går også i frosne dører og handbrekk.
No er han på veg til sjukehuset for å gi hjelp til ein Volvo som ikkje vil starte. Klokka er berre 10:30 og dette er bil nummer fem han gir hjelp til i dag.
Småkøyring tappar batteriet
Når han kjem fram, konkluderer han med at batteriet må skiftast.
– No er planen å ta bilen med til verkstaden. Når det gjeld batteriet på bilen, varierer det veldig kor lang levetid dei har. Normal tid er tre-fem år, men det er mange som klarer å ha dei opp mot ti år.
– Har du nokre godt tips når det gjeld batteriet?
– Det er ikkje så mange andre tips enn å passe godt på. Vedlikehald er eit godt tiltak med tanke på straum.
Det kalde vêret merkast også hos Frydenbø Bil i Førde. Verksmeister Ole Bernt Holme fortel at han berre i dag har hatt fem – seks bilar innom der batteriet har gitt tapt i kulda.
– Mange har bilar som ikkje startar eller har startproblem. Mykje småkøyring kan føre til trøbbel med batteriet. Dieselvarmarar og slikt tappar fort ned straumen på batteriet. Det er difor greitt å ta litt lengre køyreturar som ladar batteriet.
Køyrde med handbremsa på
Men det er ikkje berre flate batteri som skapar problem. Når kulda kjem snikande kan også handbrekket fryse fast. Dette fekk Henriette Breivik erfare.
– Handbrekket har frose, og eg har ikkje heilt fått det med meg. Dermed har eg køyrt med handbremsa på. Då eg skulle heim i går, stoppa eg på raudt lys. Då såg eg det kom svart røyk ut frå eine bakhjulet. Eg trudde eg hadde øydelagd han.
No er bilberginga på plass for å frakte bilen til verkstaden.
– No spørst det kor mykje skade det har blitt. Eg hadde ikkje tenkt å bruke så mykje pengar på bilen no, seier ho lettare frustrert.
For bilbergar Kjell Ove Hornnes er ikkje dagen slutt enno.
– Slik der ser ut no, er dagen min fullbooka, seier han.
- Les også:
- Les også: