– I dag, i kveld og i natt skal vi feire. I morgon skal vi kvile, men frå måndag av skal vi vise at denne brua har livets rett.
Då opninga var over gav han og Askvoll-ordførar Frida Melvær kvarandre ein god og varm klem.
Vegaksjonist Rolf Losnegård seier det blir spennande å sjå framover om brua fører til den forventa auken i kommunikasjonen mellom folk. Han er ein mann som er flink med ord, men han vedgjekk at han hadde vanskar med å sette ord på kjenslene.
– Det var heilt stort, å vere i lag med 2-3000 menneske inne i tunnelen, det var ei heilt elektrisk stemning. Det er uråd å sette ord på det, det er nesten uverkeleg.
- LES OGSÅ:
- LES OGSÅ:
- LES OGSÅ:
Det var fylkesordførar Åshild Kjelsnes som opna brua, men det var ikkje tvil om kven som var heidersgjest nummer ein under opningsseremonien. Då leiar Rolf Kleiven i Aksjon Dalsfjordbrua framheva Liv Signe Navarsete spesielt, svara 3000 frammøtte med trampeklapp for den tidlegare statsråden.
– Magisk augneblink
– Vi i aksjonskomiteen har hatt eit fantastisk samarbeid med Liv Signe Navarsete. Snakk om å stå på det ho har prioritert. Heilt fantastisk den innsatsen ho har gjort for oss. Ho var den som fekk den største responsen frå dei frammøtte, og det er ektefølt frå HAFS-regionen, sa Kleiven.
Ei tydeleg rørt Liv Signe Navarsete reiste seg opp for å ta imot applausen under opningsseremonien for Dalsfjordsambandet.. Til NRK sa ho etterpå at ho ikkje var heilt budd på slik ros.
– Eg vart nesten feia av scena. Det er noko som heiter magiske augneblinkar. Akkurat dette var ein slik, der alle hadde den same kjensla, den gleda over at vi er der vi er i dag.
Hadde ho framleis vore statsråd hadde det nok sikkert vore ho som skar av snora som markerte at den etterlengtra brua var opna.
– Det betyr ingenting, det er rett at fylkesordføraren klipper snora, det er fylkeskommunen sitt prosjekt, som eigar og som den som har drive fram prosjektet.
– For meg er ringen slutta, eg kom i fylkestinget i 1995 saman med Rasmus Felde. Han overtydde meg om at dette prosjektet måtte Senterpartiet stå for. Det er tankevekkande å vere her i dag.
– Audmjuk over å stå her
Rasmus Felde var og til stades på bruopninga. Han hugsar godt kampen på 1990-talet og gler seg over at Liv Signe Navarsete nemnde han.
– Ja, det var godt å høyre, for ho har iallfall vore så engasjert at det er imponerande, og det varma å høyre den strålande applausen som vart henne til del.
Sjølv var han rørt over å kune stå på den etterlengta brua.
– Eg er audmjuk over å kunne stå her og sjå utover fjorden på eit slikt monument som har kome på plass i dag. Det er kjekt å få oppleve det, det er dessverre mange som ikkje fekk oppleve denne dagen.