– Trafikklys er ein ny måte å regulere produksjonskapasiteten i havbruksnæringa på. Viss miljøkonsekvensane er for store, får ein raudt lys, og produksjonen må reduserast, forklarer Yngve Torgersen.
Han er avdelingsdirektør i Nærings- og fiskeridepartementet og presenterte onsdag den nye trafikklysordninga under ein sjømatkonferanse i Florø.
Grønt lys = alt på stell
– Lyser trafikklyset gult, betyr det fare og pass på. Då blir produksjonskapasiteten frosen. Er miljøtilstanden god, og det er grønt lys, så kan ein auke produksjonskapasiteten.
Den nye ordninga skal testast til våren. Torgersen reknar med at dei første avgjerdene blir tekne tidleg i 2017. Han har inntrykk av at dei som driv i oppdrettsnæringa er positive til dei raude, gule og grøne lysa.
– Dei ser at dei er i ei næring som må drive på naturen sine premissar. Eg trur dei er samde i hovudtrekka i dette. Dei er avhengige av eit godt omdømme, seier avdelingsdirektøren.
Litt avventande ...
Blant dei som no må ta omsyn til departementet si lystavle, er Salmon Group. Kvalitetssjef Solveig Willis er avventande til korleis ordninga i praksis skal handhevast.
– Vi har jobba slik i mange år. Forskjellen er at trafikklyset vil gjelde for eit område. Det vil seie at enkelte anlegg kan gjere mykje bra, men området vil bli regulert ut frå heilskapen. Det er viktig å ha tiltak mot dei enkelte selskapa, at dei tek vare på miljøet, poengterer Willis.
Dårleg rykte
Sjømatnæringa set stadig nye eksportrekordar, og mange kan tenke seg å produsere meir for å fôre den utanlandske marknaden med stadig meir norsk fisk. Samstundes blir oppdrettsnæringa ofte framstilt som ein miljøversting. Korleis ein skal kvitte seg med stempelet, og ikkje minst kampen mot næringa sitt store hinder – lakselusa – er tema på det to dagar lange seminaret i Florø.
– Det blir gjort mykje bra, og mykje har endra seg på få år. Ein jobbar med å komme seg vekk frå behandling med medikament, og heller ta i bruk andre verkemiddel., seier Willis.
Etterlyser meir forsking
På seminaret i Florø er forsking eit viktig tema. Norges Forskingsråd sin utsending meiner ein i større grad bør bruke forskinga innan sjømatnæringa, og viser til at ein har gode røynsler frå både Rogaland og Hordaland, der næringa har gått saman med forskarar for å overvake fjordsystema.
– Men ansvaret ligg i ikkje berre på næringa sjølv. Eg trur også forskarane må bli flinkare til å vise kva dei kan bidra med inn i næringslivet. Der har vi nokre utfordringar, seier Morten Bergslien.
Betre miljø – meir oppdrettsfisk
Så er spørsmålet: Er oppdrettsnæringa så miljøvenleg at det er rom for å auke produksjonen vesentleg? Avdelingsdirektøren i Nærings- og fiskeridepartementet trur trafikklys-ordninga kan vere ein nøkkel i dette arbeidet.
– Viss vi tek dei rette grepa, kan vi produsere mykje meir enn kva vi gjer i dag, trur Yngve Torgersen.