No er under ti prosent av barnehagelærarane ufaglærde i fylket

For første gong på lenge er under 10 prosent av førskulærarane ufaglærte.

Leiken er stort sett den same, men barnehageborna i Sogn og Fjordane har betydeleg fleire kvalifiserte barnehagepedagogar rundt seg no enn tidlegare.

– Det er ei gledeleg utvikling frå 2011 til 2012 på dette, både for leiarar og pedagogiske leiarar, seier rådgjevar i utdanningsavdelinga hjå Fylkesmannen i Sogn og Fjordane, Berit Rygg.

• LES OGSÅ: Føler dei ikkje har nok tid til barna - vil ha fleire tilsette i barnehagane
• LES OGSÅ: Dei blir nokre av landets aller første barnehagelærarar

Auka med 20 på eitt år

I 2012 auka talet pedagogiske leiarar i barnehagane i fylket frå 560 til 580. Samtidig gjekk delen av årsverk blant desse som jobba på dispensasjon på grunn av manglande utdanning ned frå 13,7 til 9,7 prosent.

Det takkar Rygg Høgskulen i Sogn og Fjordane for.

– Vi veit at Høgskulen i Sogndal har vore flinke og lagt til rette deltidsutdanning for barnehagelærarar i dei regionane der det har vore behov, seier Rygg.

• LES OGSÅ: Manglar 6.000 førskulelærarar
• LES OGSÅ: Førde manglar pedagogar - sjølv om dei tilbyr 20 000 meir i løn

Har klart å halde på dei utdanna

Våren 2012 gjekk 36 barnehagelærarar ut frå denne utdanninga, dei fleste til barnehagejobbar der dei trengdest mest.

– Vi har greidd å rekrutterer ganske mange til Sogn og Fjordane. Vi har klart å halde på dei som har teke utdanning fordi dei har klart å kombinere dette med hus, heim og arbeid, seier Rygg.