Patronen og Holsæther ute med karantene

Både Ruben Holsæther og Hannu Patronen har samla opp tre gule kort. Dermed må begge stå over kampen mot Lillestrøm i morgon.

• Her kan du følgje kampen frå klokka 15.30 laurdag

Assistenttrenar for Sogndal, Tom Mangersnes, ser på det som ein moglegheit til å la andre spelarar få sjansen.

– Vi har ein stor og god tropp etter kvart, og det er mykje konkurranse om plassane. Det at nokon får karantene, det er ein del av spelet, men samstundes gir det oss i trenarteamet moglegheit til å sleppe til folk som fortener det, og der har vi fleire, seier han.

• LES OGSÅ: Støtta frå familien avgjerande for at suksesstrenaren har skrive ny kontrakt

Trur på jamn kamp

Mangersnes trur det vert ein jamn fotballkamp med tanke på historikken mellom Sogndal og Lillestrøm.

– Lillestrøm avgjorde eit minutt på overtid i sin heimekamp i fjor, og vi avgjorde tre minutt på overtid i vår heimekamp, og i vår var det litt som engelskmennene kallar det «game of two halfs», der Sogndal leia 2–0 til pause, og det var 2–2 i andre omgang med ein litt kontroversiell avslutning, seier assistenttrenaren.

• LES OGSÅ: «Vi var heilt elendige første kvarteret»
• LES OGSÅ: Viktig trepoenger til Sogndal

– Det har vore veldig tette og jamne kampar og mykje dødballar og sånt i kampbiletet i dei kampane der. Eg ser fort føre meg at det kan bli ein liknande kamp i morgon.

Andre får sjansen

Av aktuelle spelarar som kan erstatte Patronen og Holsæther trekkjer Mangersnes fram Magnus Stamnestrø, som han meiner har vore god, sjølv om han ikkje har spelt så mykje. I tillegg nemner han Bjørn Inge Utvik og Espen Næss Lund.

– Det er litt av det Sogndal skal vere, at vi finn nye som får lov til å gå inn og ta opp arven etter andre, meir etablerte når dei forsvinn ut, seier Mangersnes.

• LES OGSÅ: – Har alle føresetnader for å ta nivået vidare

Tidlegare denne veka sa U21-landslagstrenar Tor Ole Skullerud at Sogndal har vore eit flaggskip på dette med å få fram unge, lokale spelarar. Såleis trur ikkje Mangersnes at dei ligg dårlegare an i morgon fordi dei har to spelarar med karantene.

– Kvar kamp lever sitt eige liv. Vi har vore førebudd i to veker sidan Brann-kampen på at både Ruben og Hannu er ute. Og i kampen før der heime mot Viking spelte vi ein av våre beste kampar, og det når Azar var ute med sjukdom. Så vi har fått ein god og brei tropp med mykje konkurranse etter kvart og då må vi vere budd på å bruke heile troppen, seier han.