Skal syne norsk skog på tysk og fransk TV

– Kan du gjere det der igjen?

Den tyske regissøren Friederike Schlumbom avbryt kursleiaren midt i ein demonstrasjon av tryggleik rundt motorsagbruk. Ho kommanderer lydmannen og fotografen rundt for å få dei rette bileta.

Dei tre kvinnene som skal lære seg å bruke motorsag må smørje seg med tolmod, for ting må seiast både på norsk og engelsk. Norsk fordi dokumentaren skal dubbast til tysk, og engelsk for at TV-folka skal forstå.

Les også: Han blei møtt med jubel hos skognæringa

Skogguiden

TV-teamet kom til Norge 16. mai for å lage dokumentar om norsk skog og skogbruk for den tysk/franske kanalaen GEO Kultur. Det er ein slags europeisk versjon av National Geographic, fortel dei sjølv.

Dei kontakta organisasjonen Kvinner i Skogbruket, der Merete Larsmon frå Kårstad i Bygstad er leiar.

– Eg og familien har blitt litt av den raude tråden, fortel ho.

Les også: Norges største sagbruk kan byggjast i Gulen

For Larsmon er ikkje berre organisasjonsleiar. Ho er også tilsett som fylkesskogmeister hos Fylkesmannen, og driv sjølv med skogbruk saman med mannen sin.

I dei to vekene TV-teamet har vore i Norge har dei fått sett mange ulike sider av norsk skogbruk. Dei har filma stormskadd skog med drone i Gaular, sett skogsdrift i storskala i Hyllestad, Hopperstad stavkyrkje i Vik, og studert vikingskipet i Bygstad som no står i opplag. I tillegg har dei vore i Bergen og sett på mellom anna trehusa på Bryggen.

– Eg trur også eg har klart å få dei til å kome igjen og lage ein eigen film om det store vikingskipet som skal lagast i Nordfjord, seier Larsmon.

Les også: Første overskotet for Massiv Lust

– Dei vil elske den

På eit bord på tunet hos familien hennar vert motorsager plukka frå kvarandre. Kvinnene må lære seg alt om saga før dei kan bruke den. At dei no blir ein del av ein TV-dokumentar som skal synast fram i Europa, er litt rart.

– Det er ikkje noko vi har tenkt så nøye over, det kan eg love deg. Så det får bli som det blir, ler Astrid Kårstad Vaka, som bur på nabogarden.

Naturen var det som lokka regissør Friederike Schlumbom tilbake. Dette blir hennar andre dokumentar frå Norge.

– Vi snakkar alltid om fiske- og oljeindustri, men skogsindustrien er også veldig viktig, og blir meir og meir viktig. Det er så mykje du kan lage av tre at eg trur mange vil vere interesserte. Eg trur det tyske og franske publikummet vil elske den, seier ho.