– Simon og faren overnatta på ei celle på Gardermoen i natt, før dei vart sette på flyet til Italia, fortel Kåre Leif Hollevik i støttegruppa for familien frå Eritrea.
Flaug frå Gardermoen torsdag morgon
Klokka 09.15, før oska stogga all flytrafikk, tok far og son av frå Oslo lufthamn Gardermoen, eskortert av to tenestemenn frå Politiets Utlendingsenhet.
– Dei flaug via Københamn til Roma. Politieskorten må Simon og faren sjølve betale for, seier ein skuffa Hollevik til NRK Sogn og Fjordane.
Han hadde telefonisk kontakt med Fkade Thsaie i 15.30-tida torsdag ettermiddag.
Stod i kø i Roma
– Då stod dei i kø framfor immigrasjonskontoret på flyplassen i Roma.
Kva som skjer vidare veit ikkje Hollevik.
– Truleg skjer det same som sist, då vart dei utstyrt med kvar sin togbilett til Bari i Sør-Italia der dei er registrerte som flyktningar. Eg har liten tru på at dei får skikkeleg innkvartering, seier Hollevik.
Støttegruppa i Florø vil no avvente Utlendingsnemnda si handsaming av klagen på ut. I mens held dei fram innsamlinga av midlar til den vesle eritreiske flyktningfamilien.