– Dette har eg betalt for heilt sjølv, for å seie det sånn.
Ruben Solheim er stasjonssjef ved Circle K i Florø, og i mange år har dei i likskap med fleire bensinstasjonar i fylket vore med på å samle inn pengar til Kreftforeninga under Rosa Sløyfe-aksjonen. I år bestemte han seg for å gjere noko utanom det vanlege – å farge bilen sin rosa.
– Eg vil vise folk at eg bryr meg litt ekstra, at eg verkeleg synest at det er viktig å vise engasjement.
Bilen er merka med "Støtt Rosa Sløyfe" og eit nummer ein kan nytte for å donere pengar. Den er parkert utanfor bensinstasjonen. Ved å køyrer rundt i ein litt annleis bil, håpar han å minne folk på at det er ein månad dedikert til veldedigheit.
Heldigvis har han aldri opplevd brystkreft i nær familie, men han fortel at han har sett fleire av vennane sine i sorg etter å ha mista familiemedlemmar.
– Det er ein frykteleg skjebne, seier han skarpt.
Kunde Linda Krossen er innom bensinstasjonen og er glad for at det er blest rundt brystkreftmånaden.
– Eg er så takksam for at folk tek tak i dette i nærområdet mitt. Eg er sjølv kvinne og i risikogruppa for denne typen kreft, og kjenner fleire som har gått bort. Me treng meir forsking for å få fleire til å overleve, fortel ho.
Kaffikopp mot kreft
For å samle inn mest mogleg pengar til Kreftforeninga har Solheim og kollegaene sett opp 11 flagg med informasjon, og dekorert bensinstasjonen med rosa plakatar. Rosa koppar står ved kaffimaskina. Desse kostar fem kroner meir enn den vanlege kaffikoppen.
– Alt går til Kreftforeninga og vi tener ingenting på dette, seier han.
Solheim meiner det er viktig å få fram at dette ikkje er noko reklamestunt, men eit ærleg og viktig bidrag for å gi økonomisk støtte til forsking av ei av verdas mest utbreidde kreftformer. I tillegg til å selje rosa kaffikoppar gir dei vekk 50 kroner av kvar bilvask.
– Bilvasken er ikkje dyrare enn før, vi donerer 50 kroner av den ordinære prisen. Ei krone her og ei krone der, det blir eit godt bidrag til slutt, seier han.
I fjor samla bensinstasjonen inn 22.850 kroner, og i år håpar han å slå rekorden.
– Eg har eit personleg mål å samle inn 35.000 kroner denne gongen, fortel han og byr på ein kaffi.