Opseth scorar mest på bortebane og når Sogndal i morgon møter nedrykkstrua Åsane kan kaupingen skyte seg forbi fleire tidlegare målkongar.
For berre Kurt Mørkøre, Tommy Øren, Alexander Ødegaard og Håvard Flo har scora fleire mål i løpet av ein sesong dei siste femten åra. Og enno er det fem kampar igjen av sesongen.
– Det var eg ikkje klar over, seier ein noko overraska Opseth då NRK.no konfronterer han med statistikken.
- Les også:
- Les også:
Fenomenet Mørkøre
Held Opseth oppe målsnittet i dei fem resterande kampane (3,3 mål vil vere rett utteljing), vil han berre ha ein bakar frå Færøyane framfor seg på lista.
Akkurat fenomenet Kurt Mørkøre er det vanskeleg å gjere noko med. I 2000 scora han nemleg 20 mål på 23 kampar i 1. divisjon. Det er eit snitt på 0,87 mål per kamp, det desidert høgaste dei siste femten åra.
- Les også:
Då var Opseth berre ti år gamal og det er ikkje mykje han hugsar frå den tida.
– Nei, det er fint lite må eg innrømme, seier Opseth.
Nest best målsnitt har Håvard Flo. Året etter Mørkøre sin fantomsesong scora Flo 8 mål på 11 kampar, som er eit snitt på 0,73 per kamp, og då i eliteserien. Flo har dessutan vore toppscorar fem av dei siste femten sesongane for Sogndal.
Tenkjer berre på opprykk
Håvard Flo er no sportssjef i klubben, men ifølgje Opseth er han ikkje den verste til å skryte over gamle bragder.
– Han pratar ikkje voldsomt om det. Tommy er nok litt flinkare til å fortelje gode røvarhistorier frå då han spelte, men Håvard kan kanskje smile litt når vi ser på gamle klipp han er fornøgd med, seier han.
I årets førstedivisjon knivar Opseth med Pontus Engblom på Sandnes Ulf om toppscorartittelen. Opseth har 13 mål, medan Engblom har scora 15. Opseth skil seg ut ved at han scorar mest på bortebane. Åtte mål på ti bortekampar luktar det Mørkøre-klasse over.
Men verken toppscorartittelen eller å klatre på lista over dei mest målfarlege spelarane til Sogndal er noko Opseth tenkjer noko særleg på. Det er opprykket alt handlar om.
– Kvar gong eg går ut på bana så forventar eg å score mål, men du må ikkje tenke for mykje. Då pleier det ikkje gå så bra, seier Opseth.
Her er Sogndal sine mest målfarlege etter år 2000:
- Kurt Mørkøre, 20 mål, 0,87 i snitt (1. divisjon 2000)
- Tommy Øren, 16 mål, 0,67 i snitt (1. divisjon 2000)
- Alexander Ødegaard, 15 mål, 0,60 i snitt (Eliteserien 2004)
- Håvard Flo, 15 mål, 0,58 i snitt (1. divisjon 2007)
- Kristian Fardal Opseth: 13 mål, 0,62 i snitt (1. divisjon 2015)
- Håvard Flo, 13 mål, 0,50 i snitt (Eliteserien 2003)
- Espen Olsen, 12 mål, 0,44 i snitt (1. divisjon 2010)
- Håvard Flo, 12 mål, 0,43 i snitt (1. divisjon 2006)
- Ulrik Flo, 10 mål, 0,37 i snitt (Eliteserien 2012)
- Malick Mane, 10 mål, 0,34 i snitt (Eliteserien 2013)
- Tarjei Dale, 9 mål, 0 35 i snitt (1. divisjon 2009)
- Mahatma Otoo, 9 mål, 0,33 i snitt (Eliteserien 2014)
- Håvard Flo, 8 mål, 0,73 i snitt (Eliteserien 2001)
- Kai Risholt, 8 mål, 0,40 i snitt (1. divisjon 2008)
- Håvard Flo, 8 mål, 0,32 i snitt (Eliteserien 2002)
- Anders Stadheim, 6 mål, 0,32 i snitt (1. divisjon 2005)
- Ørjan Hopen, 6 mål, 0,30 i snitt (Eliteserien 2011)
(Lista er basert på toppscorarane til Sogndal for kvar sesong. Unnataket er Tommy Øren, som måtte sjå seg slått av Kurt Mørkøre i 2000, men likevel er nest best på lista.)
Kjelder: www.nifs.no, altomfotball.no.