Opnar incestsenter i Førde

I dag opnar Senter mot incest og seksuelle overgrep i Førde.

– Det er eit senter for alle som har opplevd incest eller seksuelle overgrep. Det er på tide at me får eit slikt senter i Sogn og Fjordane, seier dagleg leiar Chatrine Elholm.

I eit vanleg bustadhus i Førde kan kvinner, menn, par og pårørande koma for å få hjelp eller støtte.

– Me veit at det kan vera vanskeleg å ta det fyrste steget å ta kontakt, men me håpar at dei som har problem og sit med dei åleine, so kan me vera med å fylgja dei på vegen vidare.

• LES OGSÅ: Gir 100 000 til incestsenter

«Incest skal talast i hel, ikkje teiast i hel»

– Me må ut å seia ifrå til alle om denne problematikken. Det er hjerteskjerande og det gjer noko med ein når ein høyrer om born som vert utsett for seksuelle overgrep, men me har ikkje lov til å lukka auga. Me må ta ansvar, og me her på senteret ønskjer å møte desse problema, seier Elholm.

Dei vil tilby einesamtalar, temakveldar og sjølvhjelpsgrupper.

– Menn og kvinner som har opplevd seksuelle overgrep, par og partnarar kan koma. Me vil også vera eit supplement til offentlege hjelpeapparatet.

• LES OGSÅ: No kjem incestsenteret i fylket

– Me vil ha ope hus og eit fellesskap der folk kan møta kvarandre og dele sine erfaringar.

Senteret er i eit vanleg bustadhus, noko Elholm trur er viktig med trivelege omgjevnader til eit so alvorleg tema.

– Det er viktig at det er hyggjeleg og heimekoseleg her. Det er fin utsikt, men likevel skjerma, seier ho.

Dagtilbod

– Eg trur ikkje det blir kø utanfor dørene, men eg håar at dei som sit heime og tenkjer at dette kan vera ein plass for dei, at dei torer å ta kontakt. Det er i aller høgste grad eit behov for dette i Sogn og Fjordane, seier Elholm.

Ho skal, saman med Trude Lundekvam og Siri Olsen driva SISMO, som forkortinga er.

– I førsteomgang blir tilbodet mot borna eit førebyggjande arbeid i skular, og etter kvart i barnehagar, seier Olsen.

• LES OGSÅ: - Offer for vald og seksuelle overgrep får ikkje god nok hjelp

Senteret er finansiert av 20 prosent tilskot frå kommunane og resten frå staten. Dei er heilt avhengige av støtta frå kommunane, for utan den, blir det heller ikkje noko av støtta frå staten.

– Me har fått støtte av 21 av 26 kommunar so langt. Det er me veldig nøgde med i eit oppstartsår.

Mange får ikkje hjelp

– Korleis får ein motivasjon til å ta tak i og jobbe med eit so alvorleg og grufullt tema som incest?

– Korleis kan ein la vera, når det er eit so alvorleg problem? Veldig mange sit der ute og får ikkje hjelp til problema sine, seier Lundekvam.

• LES OGSÅ: Treng støtte til overgrepssenter