Det er sjette gongen NRK Sogn og Fjordane tek turen rundt til skarpskodde 10.-klassingar for å stille meir eller mindre intrikate spørsmål. Wilhelm Støylen er den som skal køyre rundt til dei 38 skulane som er med
– Eg gleder meg veldig til å kome rundt og treffe ungdommar i heile fylket. Vi har mange gode spørsmål på lur og eg er spent på å sjå korleis 10.-klassingane klarer seg når eg kjem på besøk på dei ulike skulane, seier Støylen.
Fleire TV-sendingar
Nytt av året er at det vert fem TV-sendingar til slutt, (mot tre sendingar i fjor). Difor kjem det i år til å vere to lag frå fylket som går vidare til dei nasjonale finalane i Oslo. (Tidlegare år har vi sendt eitt lag til nasjonale finalar).
– Så i år er det endå større sjanse for å få seg ein tur til Oslo enn tidlegare år. Eg håper dette gjer at elevane synest det er endå meir spanande å vere med i årets konkurranse.
Ny innpakning
Klassequizen kan du høyre i våre radiosendingar kvardagar i halvtimen mellom klokka 15.00 og 15.30.
– Det blir ny musikk og innpakning på Klassequizen i år, så eg håper folk vil like årets utgåve av Klassequizen, seier Støylen.
