Etter mange dagar med regn kjem statsmeteorolog Halldis Berge med den glade bodskapen:
– Vi får fint ver i nesten heile fylket. Skyene lengst nord i fylket vil sprekke opp i løpet av tysdag ettermiddag. Det er nordleg bris på kysten, og opp til liten kuling i kveld. Elles blir det bra over heile fylket utover ettermiddagen og kvelden tysdag.
Med andre ord: den svært regntunge juni månad ser ut til å ende med sommarvêr i sine siste dagar.
20 grader
Men det blir ikkje veldig varmt. Tysdag vil makstemperaturen i fylket vere rundt 16 grader. Men det vil auke onsdag.
– Onsdag kan indre strok av fylket sjå 20-talet på gradestokken. Det blir stort sett fint ver heile onsdagen, men litt skiftande bris på kysten, og rundt Stad vil det vere liten kuling frå nordaust.
– Held dette ut veka?
– Ikkje heile veka. Men torsdag byrjar bra og finvêret held fram. Så skyar det til i løpet av føremiddagen. Men det ser ut til å vere opphaldsvêr, seier meteorologen.
Men framleis rundt 20 grader på gradestokken.
Til helga
Og desse varmegradene kan halde fram fredag.
– Det er usikkert kvar det er nedbør eller ikkje i fylket fredag, men det ser ut til å bli stort sett bra, med rundt 20 grader og litt skyer.
– Og på dei fleste stadar i fylket ser det ut til at nedbøren held seg vekke fram til laurdag, seier statsmeteorolog Halldis Berge.
Har du eit godversbilete? Tagg det gjerne med #nrksf på Instagram.