– Eg vil tru at fleire av fjellovergangane vil bli stengde om vêret slår til, seier trafikkoperatør ved Vegtrafikksentralen i Lærdal, Kjetil Molvær.
Det er varsla storm til helga, noko som kan råke utfarten både fredag og sundag for alle som må over fjellet. Enten vert det full vinter og kritkvit snø, eller vått og rått.
– Spørsmålet er om du treff på snø eller regn. Snø og kraftig vind er ingen god kombinasjon og skapar fort trøbbel, men samstundes kan regnet fort fryse på, seier Molvær.
Sør-Norge vil få det verste vêret dei neste dagane, spesielt skal det skal blåse godt over heile Vestlandet og Trøndelag. Nord-Norge får ikkje like kraftige byer, men det vert kaldare og snøen legg seg. Sørlandet og Austlandet slepp lettare unna.
– Reis tidleg på fredag
Må du mellom aust og vest i helga, så gjer det tidleg, åtvarar meteorologen.
– Det er best å ta turen over fjellet tidleg på fredag, før det bles opp til storm. Sjekk uansett vegmeldingane gjennom heile helga, seier meteorolog Rafael Escobar Løvdahl.
På laurdagen vil vinden minke, men då vil snøbyer framleis by på vanskelege køyreforhold i fjellet.
– Høgtrykk i vest og lågtrykk i nord vil kollidere og skape mykje vind. Det roar seg på laurdag, men på sundag vil det blåse opp på nytt. Då får vi truleg storm dei mest utsette stadane på slutten av helga, seier Løvdahl.