I Årdal var resultatet i dei ni første månadene i år 338 millionar kroner. Det er 133 millionar betre enn på same tida i fjor. I Høyanger noterte dei seg for 90 millionar, som er 30 millionar meir enn i same perioden i fjor.
Viktigaste årsaka til dei gode resultata er den høge prisen på aluminium på verdsmarkanden. I tredje kvartal i år låg prisen på 1677 dollar pr tonn, og det er 232 dollar over fjoråret. Og det er etter sommarferien det har gitt størst utslag, på dei siste tre månadene har Årdal Metallverk sopt inn 133 millionar kroner for Hydro Aluminium.
I tillegg til god pris har metallverka produsert meir aluminium enn i fjor - særleg i Årdal der dei produserte om lag 20.000 tonn meir - med færre tilsette.
Felleskostnadene til Hydro Aluminium er med i resultata til dei enkelte metallverka. Det betyr at utgiftene med hovudkontoret i Oslo blir trekte frå overskota som blir skapte på produksjonsstadene.
Det er rekna med at prisane på aluminium vil gå nedover att, men plassjef Ove Bakke i Årdal reknar med at pengane vil strøyme like friskt inn resten av dette året.