Med arabisk tolk på telefonforbindelse, forklarer Sebastian Delgado frå KLP, heilt enkle ting for flyktningane ved Jølster mottak. Enkelt for dei som allereie kan det, men ofte heilt ukjent for mange.
KLP har utvikla eit introduksjonskurs i privatøkonomi for flyktningar som har fått opphaldsløyve og er på veg ut i ein kommune. Dei skal halde tolv kurs ved seks av mottaka som Norsk Folkehjelp driv.
– I Norge så får du løn via ein konto, vi betalar ikkje kontantar. Om du må kjøpe bil er det fullt mogleg med eit lån. For oss i Norge er det heilt vanleg å bruke Visa-kort, men ein treng ikkje reise langt før ein faktisk må bruke kontantar, seier gruppeleiar i livsdivisjonen til KLP, Sebastian Delgado.
- Les også:
Er ikkje vande med bankkort
På Jølster mottak sit det om lag 50 flyktningar med særs forskjellig bakgrunn og nasjonalitet. Dei har fått lære meir om korleis dei skal klare seg økonomisk i Norge.
– Vi har mange problem å løyse. Eg har ikkje bankkonto eller kort, så vi har mange ting eg må lære, seier Moayad Khalil og Mohamed Alabdullah som har flykta frå Syria.
- Les også:
Dei har studert på universitet utanfor heimlandet og kan det meste som blir sagt frå før. Men Mohamed trur mange veit lite og kan ha bruk for kurset. Sjølv synest han det blir uviktig samanlikna med andre ting som bør ordnast.
– Uansett om økonomien er viktig, har vi andre ting vi må prioritere først, seier han.
Khalil og Alabdullah har likevel vore nyttige for dei andre bebuarane på Jølster mottak. Dei fortel at mange på mottaket har spurt dei om hjelp til å lære om til dømes banktenester.
Meiner kurset har stor verdi
Men for dei fleste har kurset stor nytte, trur både leiinga ved mottaket og kursleiinga.
– Dette er veldig enkel basisinformasjon. Vi veit at dei som bur her har litt forskjellig bakgrunn. Nokon veit litt meir, nokon veit litt mindre. Informasjonen er til personar som har fått opphald i Norge. Dei ventar på å få ein plass i ein kommune som kan ta imot dei, så dette er på ein måte ein startpakke, seier Delgado.
Informasjonsansvarleg ved Jølster mottak, Åsmund Hjelle, stadfestar at det går føre seg mykje opplæring mellom bebuarane, men at slik kursing likevel er svært verdifull.
- Les også:
– Det å høyre ting frå naboen ein annan bebuar kan sjølvsagt vere nyttig, men det å få det frå ein læremeister er alltid det beste.