Landbruks- og matminister Jon Georg Dale (Frp) hadde teke turen til Balestrand på eit av dei heller hyggelege oppdraga i dag. Der skulle han stå for den offisielle opninga av Ciderhuset.
Men før han kom så langt stod bøndene i kø for å få sagt sine velvalde ord til ministeren som ikkje har ville gje dei lønsauken dei har kravd.
– Han kjem med påstandar heile tida og meiner alt er så bra, seier ein tydeleg oppgitt bondelagsleiar Anders Felde i Sogn og Fjordane etter mange minutt med munnhoggeri mellom dei to.
Sperra matvarelager
Tysdag denne veka braut bondeorganisasjonane og staten forhandlingane i årets jordbruksoppgjer. Bøndene kravde 1,45 milliardar kroner, medan staten sitt første tilbod var på 410 millionar, nesten ein milliard mindre enn kravet.
- Les også:
Irriterte bønder har sidan i går vist si misnøye med staten gjennom fleire aksjonar landet rundt. I morgontimane i dag vart 26 matvarelager fysisk sperra av i tre timar, slik at det ikkje var mogleg å køyre ut matvarer til butikkane. Ministeren trur det var klokt av bøndene å ikkje dra aksjonen lenger ut i tid.
– Eg trur ikkje vanlege folk har forståing for at bøndene stoggar tilgangen til den maten dei er avhengige av. Og som gjer at dei i dei aller fleste tilfelle vel norsk mat i butikken, seier Dale.
Då han vart intervjua etter konfrontasjonen med bøndene i Balestrand, heldt han fast ved at det er kravstore bønder som har skulda for brotet i forhandlingane.
– Eg meiner staten har strekt seg langt for å få til ein avtale. Men bøndene kravde ein inntektsvekst på ni prosent i ein periode der andre grupper kan vente seg tre prosent. Så langt kunne ikkje staten strekkje seg.
- Les også:
- Les også:
Vil degradere matministeren
For bondelagsleiar Anders Felde er det ikkje noko alternativ å fire på krava. Spesielt bøndene med dei små og mellomstore bruka må få meir igjen for jobben dei gjer, er kravet.
– Vi reknar med at tilbodet blir overprøvd i Stortinget. Då utfører vi på ny degradering av matministeren sin påverknad i norsk landbrukspolitikk, seier Felde.
– Norske bønder gjer eit utruleg viktig arbeid året gjennom for at vi skal ha trygg mat på matbordet vårt. Eg gjekk i forhandlingar med sikte om å få til ein avtale også i år, men det let seg dessverre ikkje gjere. Det betyr ikkje at vi ikkje skal halde fram med å utvikle norsk matproduksjon. Det skal denne regjeringa bidra til, seier matministeren.
- Les også:
- Les også: