Heiar fram sonen i monsterbakken

– Det er jo heilt eventyrleg at vi er her og skal sjå Anders i VM, seier Ellen Bodil Kirkeeide til NRK.no.

Saman med mannen Ola Anders Fannemel står ho på sletta framfor monsterbakken i Vikersund. Dei ventar spent på kva sonen Anders Fannemel kan prestere i VM i skiflyging.

Første ordinære omgang vart fredag avlyst på grunn av vinden, men laurdag er planen å avvikle tre teljande omgangar for å kåre ein verdsmeister.

• LES OGSÅ: Omgangen avlyst - Fannemel trur det kan vere ein fordel for han

– Aldri tenkt tanken eingong

Sjølv har foreldra aldri drøymt om at sonen deira skulle komme til VM – og attpåtil av mange trekt fram som ein av outsiderane.

– Nei, det har eg ikkje ein gong tenkt på, seier Ellen Bodil.

– Det er klar eg har sett at han har hatt talent, og at han kunne komme langt. Og etter kvart sa han at dette var draumen hans. Men eg har iallfall aldri tenkt at det skulle bli no.

• LES OGSÅ: Hadde berre 20 hopp i skiflyging - tok tredjeplassen i VM-kvaliken

Anders Fannemel sjølv har overfor NRK.no sagt at han tykkjer det er stas at foreldra og folk frå Hornindal har teke turen til Vikersund for å oppleve debuten hans i VM.

(Artikkelen held fram under artikkelen)

Fannemel kan vere ein joker

Anders Fannemel var best av alle hopparane då han sette ny personleg rekord med 223,5 meter under den andre prøveomgangen torsdag.

No meiner fleire hoppekspertar at den unge honndølen kan vere ein joker under VM.

– Det er ikkje noko eg vil vurdere. Eg har ikkje kompetanse til det, seier Ellen Bodil.

– Ja. Men berre det at han har komme hit er fantastisk. Og så lenge han klarte kvaliken, er resten heilt greitt for meg. No er resten berre kjekt, seier ho.

• LES OGSÅ: Fannemel lengst i prøveomgangen

Midtpunkt med 25.000 i bakken

Anders Fannemel har denne vinteren komme inn i verdseliten som ein real hoppkomet. Med framgangen har også interessa frå media auka monaleg.

Og: Laurdag er det venta 25.000 tilskodarar i skiflygingsakken i Vikersund.

– Det ser ut for at han taklar presset bra. Han smiler iallfall – og det er ikkje dårleg, ler pappa Ola Rasmus.

• LES OGSÅ: Trur Fannemel kan ta medalje

Men kva tenkjer eigentleg ei mamma når sonen kastar seg utfor ein hoppbakke og svevar over 200 meter?

– Hadde nokon sagt det til meg før han byrja å hoppe, hadde eg nok svart at eg ikkje orkar å sjå på. Men etter kvart blir ein trygg på at han klarer det, du venner deg til tanken og ser at det går bra, seier Ellen Bodil.

FØLG VM I NETT-TV FRÅ KLOKKA 14:00