Ingen har vore i kontakt med Fridtun sidan om lag klokka 18.30 fredag kveld.
- LES OGSÅ:
Ingen har høyrt frå Fridtun
Fridtun var saman med om lag 650 ungdomar på AUF sin sommarleir på Utøya då ein mann, som no er pågripen av politiet, starta å skyte rundt seg.
NRK hadde kontakt med Fridtun på telefon om lag klokka 18.00 fredag kveld. Då låg ho saman med 20 andre ungdomar i vasskanten på Utøya.
NRK høyrde skyting gjennom telefonen.
Prøver å få kontakt
Arbeiderpartiet lokalt, med fylkesleiar Nils P. Støyva, har sidan i fredag kveld arbeidd med å få kontakt med Fridtun utan å lykkast.
Støyva seier det har vore ei vanskeleg natt.
– Eg hadde aldri trudd eg skulle oppleve noko slikt, seier fylkesleiaren.
Fridtun er 20 år gammal og kjem frå Stryn.
Ho vart vald til fylkesleiar for Sogn og Fjordane AUF i februar i år. Årets sommarleir på Utøya var den første for den ferske leiaren.
Fire andre trygge
Det var fem ungdomar frå Sogn og Fjordane på sommarleir. Dei fire andre er:
- Torbjørn Vereide frå Sandane
- Fred Ove Løtuft, frå Gloppen
- Thor Mehammer, fylkessekretær frå Florø
- Kjetil Klakegg Bergheim, frå Florø
– Eg har i natt vore i kontakt med pårørande og kan seier at fleire er i god behald, men at det også er sakna frå Sogn og Fjordane, seier Støyva.
- LES OGSÅ: Vereide i tryggleik
NRK snakka i går med far til Torbjørn Vereide, Sigmund Vereide. Han opplevde dramatiske timar medan han venta på telefon frå sonen sin.
Beredskap
Det vert no i morgontimane oppretta ein beredskap for å følgje opp dei aktuelle kommunane.
– Vi skal gjere alt vi kan for å følgje opp familiane på ein best mogleg måte, seier Støyva.
Fridtun var ved 19.00-tida laurdag kveld framleis sakna etter skyteepisoden på Utøya.