Laget leiar førstedivisjon med fem poeng. Men skadar, karantenar og eit tøft kampprogram gjer at Bakke & Co er på utkikk etter forsterkingar.
– Vi veit det blir kamp til siste slutt. Då må vi ha ein tropp som gjer at vi kan vere i toppen. Vi er alltid på utkikk etter spelarar, men dei typane som kjem inn må vere dei rette, seier Bakke.
- Les også:
- Les også:
Slit med mange skadar
For tida er nigerianske Felix Obada på prøvespel. Han har mellom anna vore tre år i Premier League i Sør-Afrika. I treningskampen mot Førde i går fekk han eit innhopp, dagen før fekk han nitti minutt for andrelaget.
– Han er ein fin type som heilt sikkert kan spele på dette nivået. Så får vi berre sjå om han er rett mann for oss, seier Bakke.
AKTUELL: Kantspelaren Felix Obada er på prøvespel i Sogndal. Her varmar han opp under treningskampen mot Førde i går.
Foto: Rune Fossum / NRK- Les også:
Alt i alt er han nøgd med troppen slik den er i dag. Men skadeproblem tvingar dei til å sjå etter alternativ.
Ulrik Flo, Robin Shroot, Eirik Skaasheim, Bjørn Inge Utvik og Lars Christian Kjemhus har alle slite med skadar i ferien. Ruben Holsæter og Kristoffer Ryland treng begge tid for å kome i form etter lange avbrekk.
– Troppen når alle er fullt tilbake blir bra, men vi er alltid ute etter å forsterke oss. Så det kan hende det kjem inn ein eller to nye. Og så håper vi å behalde dei vi har, seier Bakke.
Forventar ein tøff haust
I sommar signerte dei Peter Aase frå Florø, men Bakke trur ikkje han er klar til å gå rett inn i førsteellevaren.
– Han er ein spelar vi kan bruke, men han treng tid til å komme inn i vår måte å spele på. Men utover sesongen og i åra som kjem er han ein spelar eg trur vi vil få mykje glede av, seier Bakke.
I august ventar seks kampar. Avslutninga på vårsesongen, med tre strake uavgjortkampar viser at det ikkje blir nokon parademarsj mot eliteserien for Sogndal.
– Det blir ein tøff haust for alle. Vi ligg bra an og så har vi nokon som jaktar bak oss. Jobben vår blir å halde dei på avstand, seier Bakke.
