På årsmøtet til Årdal Arbeidarparti i går var det tydeleg at det er byrja å snike seg inn ein tvil i Årdal om Arbeidarpartiet vil halde dei fagre løfta om eit aktivt eigarskap.
Industribygda er avhengig av at Hydro snur og ventar med å stengje ned dei gamle Søderberg-omnane. Håpet er difor at staten skal bruke eigarmakta og gripe inn.
- Vag regjering
Men så langt har regjeringa vore vage på korleis dei i praksis skal gå inn og styre Hydro. På årsmøtet vart det difor vedteke resolusjonar for å påverke regjeringa med krav om modernisering av verket i Årdal. Ordførar Arild Ingar Lægreid på si side gjev no regjeringa ein deadline.
- Eg ventar iallefall at det skjer noko i løpet av eit halvår. Vi er lova av Hydro å få eit klart signal på kva som vil skje med Søderberg-omnane, om dei kan vere i drift nokre fleire år slik at vi betre tid til omstilling, seier han.
- Må ta samfunnsansvar
- Regjeringa må få inn representantar i styret i Hydro som tenkjer på samfunnsansvar og ikkje berre på profitt, sa sentralstyremedlem i Arbeidarpartiet, Jan Bøhler på møtet i går.
Han meiner regjeringa må vere aktive i valet til nytt styre dersom dei skal halde vallovnaden om aktivt eigarskap.
Bøhler var og klar på at krafta som vert til overs når Hydro må brukast til industrireising i bygda.
