Det kom svært overraskande på mange då det i forrige veke vart kjent at Wenche Lie Lysne måtte gå på dagen som assisterande klinikkdirektør i Helse Førde.
Enkelte knytte avgangen opp mot den interne e-posten som var kome ut i media.
Fleire på sjukehuset i Lærdal som NRK snakka med, var sikker på at Lie Lysne hadde fått sparken fordi Helse Førde meinte det var ho som hadde sendt e-posten vidare.
Leiinga i helseføretaket har heile tida avvist at dette har vore årsaka.
Auka løna til ortopedane
NRK Sogn og Fjordane veit i dag at det som felte Wenche Lie Lysne, har med lønsforhandlingar å gjere. Den tidlegare assisterande direktøren skal ha gitt tre ortopedar ved ortopediklinikken i Lærdal høgare løner. Korkje leiinga i Helse Førde eller Lie Lysne sjølv kan kommentere opplysningane. Dei har blitt samde om at dei ikkje skal uttale seg om saka.
Men fleire tilsette i sjukehusmiljøet i Førde veit kva som har skjedd og NRK får opplyst at Lie Lysne ikkje skal ha hatt fullmakt til å gje dei tre legane høgare løn. Det ansvaret ligg til klinikkdirektør Anne Margrete Øvsthus.
Wenche Lie Lysne har vore tilsett ved Lærdal sjukehus sidan 1986. Ho har vore assisterande klinikkdirektør i Helse Førde vel eitt år.