– Måløy er fiskerihovudstaden i fylket, og dei 20 arbeidsplassane som er knytte til Fiskeridirektoratet er heilt avgjerande. Dei er også knytte tett opp mot næringslivet i Måløy, seier fylkesvaraordførar for Senterpartiet, Jenny Følling.
Fiskeridirektoratet sitt regionkontor i Måløy kan bli flytta til Bergen, og Måløy blir då ståande att med berre eit lokalkontor.
I dag har direktoratet over 20 statlege arbeidsplassar i Måløy. Følling meiner like godt at det er Måløy som kan ha det nye føreslegne regionkontoret som skal dekke frå svenskegrensa til Stad.
- Les også:
Vil ikkje sitje stille og sjå på
Ho peikar på at både Statens vegvesen, Lotteritilsynet og Difi utviklar seg godt, sjølv om dei ligg i distriktet.
– Ein kan flytte noko hit også. Vi kan ikkje sitje stille og akseptere dette, seier Følling.
Ei omgjering av regionkontoret i Måløy til lokalkontor skal ifølgje Fjordenes Tidende vere ei tilråding frå ei intern arbeidsgruppe i Fiskeridirektoratet, og skjer fordi ein ynskjer å redusere talet på regionar. Fiskeridirektøren skal vurdere tilrådinga før utgangen av februar, og kome med ei tilråding til Fiskeri- og næringsdepartementet.
Der sit to Høgre-statsrådar, og fylket sin eigen stortingsrepresentant frå Høgre Bjørn Lødemel lovar at han skal jobbe for kontoret.
– Den saka er vi på og følgjer opp, seier Lødemel.
Også Lødemel meiner eit samanslått regionkontor like godt kan ligge i Måløy.
Fryktar fylket blir sitjande ribba tilbake
– Viss ein skal gjere endringar, så er Måløy definitivt ein stad som ein kan vidareutvikle, seier Lødemel.
Jenny Følling meiner framlegget om å flytte regionkontoret frå Måløy føyer seg inn i rekka av sentraliseringa av statlege arbeidsplassar frå fylket. Politidistrikt, høgskule og skattekontor kan oppleve at leiinga forsvinn og arbeidsplassar bli sentralisert.
– Det kviler eit stort ansvar på den sitjande regjeringa. Å stoppe opp og sjå på konsekvensane av prosessane, er heilt avgjerande. Elles kan fylket vårt sitje ribba tilbake, seier Følling.
Lødemel meiner Følling har lite å fare med.
– Eg tykkjer det er ein merkeleg påstand frå Følling når vi veit det var den raudgrøne regjeringa som la ned tollkontoret i Måløy. Det var også den regjeringa som starta opp politireforma, seier Lødemel.