– Eg er glad for at landsmøtet gjorde det klart at nynorsk og bokmål skal vere sidestilt. Dette var ei kjempebra og fornuftig avgjerd, seier fylkesleiar i Frp, Frank Willy Djuvik.
Han er delegat på landsmøtet, og seier det aldri var nokon tvil om at partiet skulle gå for å behalde dagens ordning, der nynorsk og bokmål er sidestilt.
– Vi var sikre på at dette aldri skulle få gjennomslag. Forslaget var fullt av faktafeil. Mellom anna skil dei ikkje mellom eit skriftspråk og ei dialekt, seier Djuvik.
– Vi kan aldri fjerne nynorsken
Djuvik seier at Frp aldri kan gå for eit forslag om å fjerne nynorsken. Han meiner det ligg i kjernen av ideologien til partiet.
– Vi er eit liberalistisk parti. Eit fleirtal kan aldri ta frå eit mindretal ein grunnleggjande rett.
Det var Rita Navarsete som fronta dette synet for fylkespartiet i dag.
– Ikkje ta identiteten min
– Rita var glimrande på talarstolen i debatten, seier Djuvik.
Han fortel at ho fekk skryt av både leiar Siv Jensen og Per Sandberg etter talen.
– Ho nytta argument om identitet. Ho bad landsmøtet om å ikkje ta identiteten hennar frå ho. Og skriftspråket er ein heilt klar del av identiteten, seier Djuvik.