– Det er utruleg spennande. Veldig tøft at dei har begynt med opera i Florø også. Eg gler meg til premieren, seier Kari Standal Pavelich, operasjef ved Opera Nordfjord.
Med regissør Oda Alisøy i spissen har nyetablerte OperaKysten i Florø premiere laurdag. Fleire lokale krefter både på og bak scena er i sving når Der Schauspieldirektor blir sett opp som første stykke i Flora samfunnshus.
Nykomlingen i Florø blir Sogn og Fjordane sitt tredje tilbod innan opera. Frå før har Opera Nordfjord og Åmot Operagard i Gaular fått merksemd langt utover fylkesgrensene.
Lokale aktørar på scena
– På scenen står Nora Sårheim som er ei lokal Florø-jente som held på å utdanne seg til operasongar i Bergen. Og Trond Ramstad Olsen, også han lokal frå Florø, spelar teaterdirektør, fortel Alisøy som sjølv er florøværing.
I tillegg består ensemblet av både profesjonelle og artistar som er under utdanning, fortel regissøren som sjølv har bakgrunn frå teater.
– Publikum kan vente seg fantastisk flott musikk framført av eit veldig kompetent seksmanns orkester, flotte songar og ein pen operaførestilling, lovar Alisøy.
- Les også:
- Les også:
Eldsjeler og lokal velvilje
OperaKysten vart stifta av operavener i Florø i fjor vår. På Nordfjordeid har Kari Standal Pavelich følgt spent med. Ho trur det er litt tilfeldig at vesle Sogn og Fjordane på tre år har fått tre ulike operatilbod.
– Personar på desse plassane har interesse for opera og har sett det i gang, og dei får med seg personar i nærmiljøet som hjelper til. Eg trur det er veldig personavhengig at desse eldsjelene er der. Det er spennande at dei har fått med seg andre som trur på ideen.
– Er det verkeleg marknad for tre operascener i Sogn og Fjordane?
– Ja, det trur eg. Særleg er det viktig at heimepublikumet i Florø stiller opp, men eg håpar jo at det også kjem folk frå heile fylket.
– Eg vil berre få ønske dei lykke til. Det som er viktig er å få velvilje frå lokalsamfunnet. Det trur eg dei har. Dei er flinke i Florø på arrangement, så dette trur eg skal gå veldig bra.
