Dette betyr millioninntekter for skisentera

Etter at fjorårsvinteren var den mest snøfattige på vel 60 år, gir snø i massevis no klingande mynt i kassa for skisentera i fylket. Fleire melder om tidenes vinterferieveke.

Perfekte forhold på Breimsbygda skisenter på Utvikfjellet

FANTASTISKE FORHOLD: Slike løyper har lokka hundrevis av skiglade ut på tur på Utvikfjellet. Her håpar Breimsbygda skisenter på å slå rekorden på 66 driftsdagar. – Får vi ha ope i påska bikkar vi 70 driftsdagar med god margin, seier Runar Kleppe som er driftsleiar.

Foto: Runar Kleppe

– Vi fekk påskeveka vår i vinterferien, med strålande vêr, mykje folk og rikeleg med snø. Alle rammene var perfekte, seier driftsleiar Runar Kleppe ved Breimsbygda skisenter på Utvikfjellet.

Sist sesong gjekk skisenteret i Nordfjord ein halv million kroner i minus. Denne vinteren ser rekneskapstala mykje betre ut.

– Vi har jo hatt ein heil sesong allereie, med over 50 driftsdagar, som er meir enn det vi normalt har på ein sesong, seier Kleppe.

Gjekk 1,5 millionar kroner i pluss

Etter fleire snøfattige vintrar, har denne sesongen bydd på rikeleg med snø og stabile vêrforhold. Etter at snøen la seg tjukk allereie tidleg i november, kunne mange senter opne rekordtidleg.

Glade barn på Sogndal skisenter, Jette Mellemstrand Veum og Emilie Sofie Høgheim Olstad

GLADE BARN: Smilande barn som får helse på Olafaen i Sogndal skisenter på Hodlekve denne vinteren. Her er det Jette Mellemstrand Veum og Emilie Sofie Høgheim Olstad som har ein kjekk dag i bakken.

Foto: Sogndal skisenter, Hodlekve

Vekevis med stabile snøforhold har ført til gode besøkstal for skisentera, der vinterferien sist veke ikkje var noko unntak.

– Dette var tidenes vinterferieveke for oss. Heile vinteren har vore veldig bra, og slik det ser ut no har vi eit overskot på 1,5 millionar kroner i 2017. Det er eit heilt fantastisk resultat, seier dagleg leiar Per Odd Grevsnes ved Sogndal skisenter på Hodlekve i Sogndalsdalen.

– Vi treng pengane for å byggje ut senteret vidare, seier Grevsnes.

Mange folk samlast på Arena Rindabotn i Sogndal Skisenter

YRANDE FOLKELIV: I tillegg til at vinterferien trekte mykje folk, vart også den årvisse Fjellsportfestivalen arrangert i Sogndal sist veke. – Det var eit yrande folkeliv både i botnen av heisen og rundt om på fjella i Sogndalsdalen, seier Per Odd Grevsnes ved Sogndal skisenter.

Foto: Bente Kjøllesdal / NRK

Har ikkje hatt betre forhold på 20 år

På Langeland skisenter i Gaular har dei hatt kontinuerleg skiføre sidan 11. november. Slike forhold har ikkje styreleiar Kjetil Bjørset sett liknande til dei 20 åra han har vore involvert i drifta.

– Denne vinteren er heilt makelaus. Ikkje berre har vi hatt godt med snø, vi har hatt godt vêr. Vi har jamt over hatt stor trafikk av besøkande, seier han.

Etter to magre vintrar spår han rekordomsetnad i år, noko besøkande vil sjå att i stadig nye investeringar.

– Vi har planar om både skiskyttarstadion og nytt stadionhus. Alt av inntekter kjem brukarane til gode.

Langeland skisenter

FOLK ELSKAR DETTE: Medan skisentera mange år har måtte produsere snø for å ha nok til å lage fine løyper, har det i vinter vore meir enn nok av snø. Biletet er frå Langeland skisenter.

Foto: Lilli Ann Seljeseth

– Vêret har vore midt i blinken

– Vi hadde veldig bra besøk kvar einaste dag sist veke, der det toppa seg med over 450 stykk i trekket på laurdag, seier driftsleiar Amund Sverre Tomasgard ved Hornindal skisenter.

Dei kan ikkje skilte med rekordbesøk i vinterferien, men seier sesongen sett under eitt har vore svært bra. Ved utgangen av 2017 stod skisenteret att med over ein million kroner i overskot, og med ei god påske i år trur Tomasgard på gode plusstal også i år.

– Dette gir oss moglegheit til å vidareutvikle oss og tilby endå betre tenester til dei som kjem hit.