Bilførarane hadde køyrt ei stund før dei vart stogga, og fekk med naud og neppe køyre vidare etter kontrollen.
Men først etter at dei hadde skrapa ferdig frontruta.
– Dei hadde køyrt så pass lenge at ruta var noko opptina. Dei fekk køyre vidare med ei skriftleg åtvaring. Den blir liggande i vårt kontrollsystem. Blir dei stogga ein gang til, så blir dei melde, seier kontrollør Svein Arne Henjesand.
– Ta deg tida
Henjesand seier rutene var heilt på grensa til å bli politimat. Han seier det er stor risiko knytt til det å ikkje skrape frontruta og begge siderutene framme. Og følgjene kan fort bli verre enn berre bot eller førarkortbeslag.
Les også: Slik bør du ikkje køyre
– Det er fort å komme ut for noko, at du køyrer på nokon, skaper farlege situasjonar eller kjem ut for alvorlege trafikkulukker, seier Henjesand og har følgjande oppmoding til bilistane:
– Ta deg tid til å gjere rutene reine for is før du startar køyreturen. Det skal ikkje vere noko som hindrar sikta i synsfeltet. Då er det heilt klart at heile rutene må vere skrapa.
– Kva følgjer kan det få om du eller politiet stoggar deg?
– Om det ikkje har skjedd noko før, så må ein skrape og ein kan bli meld. Er det alvorleg, så misser du førarkortet. Du set deg sjølv og andre i fare om du ikkje ser godt nok når du køyrer.