– Det har vore ein del meldingar, ja. Og jenter som vil bli ven med meg. Dei vil vel på Gardeballet, ler Jørgen Henden frå Eid.
- Les også:
- Sjå TV-innslag og video frå 17. mai i Sogn, Sunnfjord og Nordfjord
- Her kan du sjå lesarane og NRK sine bilete frå 17. mai i Sogn og Fjordane
Solonummer
21 år åringen imponerte både tilskodarane på Karl Johan og tusenvis av TV-sjåarar då Gardetroppen heldt si tradisjonsrike drilloppvising 17. mai. Midt i NRK1 si direktesende «Gratulerer med dagen!»-maratonsending marsjerte Henden ut av Gardetroppen og framførte eit solonummer der han drilla med geværet til jubelrop frå publikum.
– Viss ein veit ein skal på TV, er det naturleg at ein er nervøs. Eg var nok litt nervøs, men når eg først kom i gang, tenkte eg ikkje på det. Det gjekk fint, oppsummerer Henden sjølv.
(Artikkelen held fram under videoen.)
La grunnlaget på Nordfjordeid
Nordfjordingen gjer førstegongsteneste i Garden på Huseby leir. Han har tidlegare drive med drill i samband med det historiske spelet Elskhug & eksersis på Nordfjordeid.
– Det må mykje trening til på ei oppvising som den i dag. Det er små marginar og mange ting som kan henge seg opp. Til dømes våpenreima. Eg byrja å trene rundt juletider, men det var først for to-tre veker sidan at eg verkeleg byrja å førebu meg.
(Artikkelen held fram under biletet.)
Fekk beskjed onsdag
Sjølv var han usikker på om han ville rekke å trene inn framsyninga til 17. mai. Og berre for eit par dagar sidan fekk han vite at det faktisk var han som skulle stå for solonummeret midt i Oslo si paradegate.
– Eg viste fram programmet mitt måndag, og fekk ta eit oppdrag inne i Huseby leir onsdag. Eg gjorde det bra på Huseby, og fekk beskjed om at eg skulle drille på 17. mai.
Trass nokre sekund i rampelyset som gardist på nasjonaldagen, ser nordfjordingen ikkje føre seg å halde fram i Garden.
– Eg dimmar 9. september. Då er planen å ta folkehøgskule og slappe litt av, seier drillgardist Jørgen Henden.