Laga heile bygda si av peparkake

Britt Jannicke Lundal jobbar som kokk på Stardal Bygdetun og har vore med å laga eit miniatyr av bygdetunet som peparkakebygda står i.

– Eg er ikkje frå bygda sjølv, så difor måtte eg bidra med å lage min eigen arbeidsplass, smiler ho.

Lundal synest det var kjekt at heile bygda kunne samlast for å lage sine eigne hus og gardar av peparkaker.

– Det er ein fin måte å vere saman på og så er det jo sjølvsagt veldig kjekt å sjå kor kreativ ein kan vere, fortel Lundal.

Ingrid Hjelle er tilsett ved barnehagen som ligg i same hus som bygdetunet. Ungane fekk vere med å lage peparkakehus. Det var stas for både ungar og vaksne.

– Det er kjekt å få vere med på å lage sin eigen heimstad. Det er samlande og kjekt, fortel Hjelle.

Sjølv tok ho på seg ansvaret å lage NAF-bana.

– Det var ingen andre som ville, det var litt vrient å få til. Men eg tok ein for laget, flirer Hjelle.

Peparkakebygda har 22 hus. Og det er huseigarane som står bak.

– Alle har laga sine eigne hus og gardar, det trur eg dei fleste synest det er spennande, fortel Marit Flatjord.

Ho har vore ei av dei som har stått i bresjen for å få til arrangementet for andre gong år på rad.

– Bergen har peparkakebyen og vi har peparkakebygda. Vi er jo stolte av bygda vår.

No gler Flatjord seg til neste år.

– Eg håper dette kan bli fast tradisjon, avsluttar ho.