Dei har fått over 300.000 i pengegåver

Til saman har rundt 300.000 kroner tikka inn på kontoen i samband med aksjonane.

– Det aller meste har gått til det praktiske til aksjonane, og det vil så klart ikkje gå til bøter, seier nestleiar i Natur og Ungdom, Magnus Storvoll Strømseth.

• Les også: Politiet skriv ut bøter for over ein million kroner

Pengestøtte og gratis advokat

Men i tillegg går det også føre seg innsamling til bøtene, utan at Strømseth kan seie kva summen er komen opp i der.

– Det er ikkje vi som driv med dette. Det er folk som ikkje har vore med og aksjonert sjølv, men som ønskjer å bidra til aksjonane, seier han.

Alt frå privatpersonar til foreiningar og fylkes- og lokallag frå ulike politiske parti, har støtta dei. I tillegg har aksjonistane fått gratis juridisk rådgjeving frå den velkjende høgsterettsadvokaten Harald Stabell.

– Vi har under heile aksjonsperioden hatt kontakt med Harald Stabell, i høve til spørsmål om juridiske problemstillingar. Han hjelper oss når han har tid, utan å ta betalt for det, seier Strømseth.

• Les også: Arresterte tre partileiarar for sivil ulydnad

– Vil han også hjelpe dykk i ei eventuell rettssak mot Nordic Mining?

– Det kan tenkast, men det er ikkje noko vi har avklart med han førebels.

Stabell stadfestar dette overfor NRK.

– Eg har sagt at vi får snakke om dette dersom det blir rettssak. For mitt arbeid til no vil eg ikkje ta betaling, skriv han i ein SMS.

• Les også: Vil få gruveinvestorar til å trekkje seg

– Trist at folk betalar for ulovlege aksjonar

For Nordic Mining har aksjonane skapt store forseinkingar i prøveboringsprosessen. Til slutt fekk gruveselskapet nok, og varsla søksmål.

I ettertid har dei revurdert trugsmålet. Administrerande direktør Ivar Fossum sa til NTB at dei ville vente fordi dei ikkje hadde full oversikt over ekstra kostnader som følgje av aksjonane.

Nordic Mining-direktøren har lite til overs for at folk vel å støtte aksjonistane økonomisk.

– Eg synest det er trist at folk er med og betalar for ulovlege aksjonar. Vi har gjort alt vi kan for å følgje lover og reglar, og andre fremjar synspunkt gjennom ulovlege aksjonar, så eg har ikkje så mykje sympati med dei, seier Fossum.

• Les også: Her er dei første boreprøvane frå Engebøfjellet

Han har ingen kommentar til at Harald Stabell har strekt ut ei hjelpande hand til aksjonistane. Førebels har ikkje Nordic Mining teke ei endeleg avgjer i høve til om dei vil gjere alvor av trugslane om søksmål.

– Vi fokuserer på å ta igjen forseinkingane og gjere boreprosjektet ferdig, så får vi kome tilbake til det etter kvart, seier Fossum.

• Les også: Vil tene fire milliardar på gruvedrift