Dette får kulturen i fylket

– Klart dette er gledeleg, sjølv om det var venta, seier dagleg leiar Ingemar Sårheim.

Det har tidlegare vore kjent at countryfestivalen på Breim ville få auka løyvingar i samband med at dei tidlegare i år vart tilkjent knutepunktstatus frå 2012.

• LES OGSÅ: Countryfestival kan få gjev status
• LES OGSÅ: Huitfeldt besøkjer countryfestival

Med status fører også auka utgifter

– Dette hjelper godt, men det er klart at vi vil få auka utgifter neste år i samband med ny status, seier Sårheim.

Norsk Country Treff har eit totalbudsjett på mellom fem og seks millionar kroner. Førebels har dei ikkje tal på nøyaktig kor mykje større utgiftene vil bli.

– Det kjem an på kva vi legg i dette. Eg vil også tru at det ligg med nokre premissar med denne statusen og løyvingane som følgjer med, seier Sårheim.

Løyvinga på 1,2 millionar kroner er 700.000 kroner meir enn det festivalen fekk i fjorårets statsbudsjett.

• LES OGSÅ: Gloppen er årets kulturkommune
• LES OGSÅ: Countryfestival kan få gjev status

700.000 kroner til musea

Musea i Sogn og Fjordane får 718.000 kroner meir i årets statsbudsjett enn i fjor, og får dermed ei totalløyving på nær 23,9 millionar kroner.

Fylkesdirektør for kultur, Ingebjørg Erikstad, er førebels ikkje imponert.

– Viss det berre er desse 700.000 kronene, er det ein liten nedtur, seier Erikstad, som hadde venta spesifikke midlar til Norsk Kvernsteinsenter i Hyllestad.

Ikkje eitt øre til Kvernsteinsparken

– 700.000 kroner hadde vore heilt greitt, hadde det berre vore ein auke som tok inn over seg at Norsk Kvernsteinsenter skulle få ein auke økonomisk, seier Erikstad.

Ho legg ikkje skjul på at ho er skuffa.

– Førdefestivalen, musea og teateret har i realiteten berre fått ei prisjustering. Opera Nordfjord har ein auke på ti prosent. Men som sagt, det er det faktum at Norsk Kvernsteinssenter ikkje er nemnt med eit ord, som er tyngste beskjeden i dag, seier Erikstad.

(Artikkelen held fram under biletet)

Dagleg leiar ved Norsk Kvernsteinssenter, Astrid Wåge, tykkjer det er ein svart dag. No set ho sin lit til at fylkeskommunen vil berge senteret. Neste års budsjett er på 4,5 millionar, der fylkeskommuen har lagt inn 1,5 millionar. Men dette var i forvissing om at staten kom til å løyve pengar, og det har no ikkje skjedd.

– Viss fylkeskommunen ikkje finn pengar, så er det krise, seier Wåge.

Ho hadde sett fram til å kunne tilsetje fleire folk, og ikkje minst fått på plass eit fagmiljø.

– Vi skulle gjerne fått inn nokon med forskningskompetanse. Men det klarar vi ikkje no. Hovudfokus no må vere å klare å oppretthalde dagens drift, seier Wåge.

• LES OGSÅ: Riksantikvaren vitja kvernsteinbrot

– Høyrest litt tynt ut

Også direktør ved Sogn og Fjordane fylkesmuseum, Morten Johan Svendsen, er måteleg imponert over statsbudsjettet.

– I utgangspunktet høyrest 700.000 magert ut. For kunstmuseet sin del hadde vi søkt om meir fordi vi skal ta i bruk eit nybygg neste år, seier Svendsen.

Musea i Sogn og Fjordane består av Nordfjord folkemuseum, Kystmuseet, Sunnfjord museum, Sogn folkemuseum, Reiselivsmuseet og Sogn og Fjordane fylkesmuseum.